استانادا جاپون سۋرەتشىلەرىنىڭ كورمەسىندە «كۇنشىعىس» ەلىنىڭ سيرەك ونەرى ۇسىنىلدى - فوتو
كورمەگە اكەلىنگەن 35 تۋىندى جاپونداردىڭ ءداستۇرلى «نيحونگا» اتتى كەسكىندەمە ونەرىندەگى، سونىمەن قاتار «ۋرۋشي» سيا كەسكىندەمەسى مەن شاعىن نىساندار ءمۇسىنى ونەرىندەگى قازىرگى زامانعى سۋرەتشىلەردىڭ جاڭاشا ماقامىن كورۋگە بولادى.
«جاپونيانىڭ ەڭ ۇزدىك بەس سۋرەتشىسى وسىنداي كورمەنى العاش رەت ۇيىمداستىرىپ وتىر. ءتۇرلى تەحنيكالارعا قاراماستان، بەسەۋىنىڭ دە ونەرى ءوز ەلدەرىنىڭ تەرەڭ تاريحىمەن استارلاسىپ جاتىر»، - دەيدى «سۋمي- ە» سياسىمەن سالىنعان سۋرەتتەردىڭ اۆتورى، ازيا ونەرى قاۋىمداستىعىنىڭ پرەزيدەنتى ميزوگۋچي بوكۋدو.
ەكسپوزيسيادا ميزوگۋچي بوكۋدونىڭ تۋىندىلارىمەن قاتار، ۋرۋشي ونەرىن اتادان بالاعا قالدىرىپ كەلە جاتقان ءداستۇرلى سۋرەت ونەرىنىڭ شىراقشىلارى اۋلەتىنىڭ ۇرپاعى ميتامۋرا اريسۋمانىڭ، ءمۇسىنشى، توكيونىڭ ونەر ۋنيۆەرسيتەتىنىڭ رەكتورى مياتا رەحەيدىڭ، مادەنيەت ۋنيۆەرسيتەتىنىڭ پروفەسسورى دايتو كاۆاچي كۋنپەي مەن نيحونگا سۋرەت ونەرىنىڭ وكىلى سايتو نوريحيكونىڭ كارتينالارى مەن مۇسىندەرى ۇسىنىلىپ وتىر.
قازاقستانداعى جاپونيا ەلشىسى كاموحارا ماساەسيدىڭ اتاپ وتكەنىندەي، بارلىق شىعارمالاردا جاپوندىقتاردىڭ كوركەمسۋرەت ونەرىن نازىك ءتۇيسىنۋ قابىلەتى بايقالادى.
ۋرۋشي تەحنيكاسىنىڭ كەرەمەت تۋىندىلارى وسىندا. جاپوندىق شەبەرلەردەن بولەك، بۇل ونەردى الەمدە ساۋساقپەن سانارلىق ادام مەڭگەرگەن. ەۋروپادا شامامەن 10 ادام، رەسەيدە - 3-5 ادام سالا الادى»، - دەيدى قازاق ۇلتتىق ونەر ۋنيۆەرسيتەتى كوركەمسۋرەت فاكۋلتەتىنىڭ دەكانى ارداق ءجۇسىپوۆا.
ۋرۋشي تەرمينى - اعاش دەگەن سوزدەن شىققان. ۋرۋشي اعاشىنىڭ ءسولى («لاك» ورىسشا) قارۋ- جاراق، دۋلىعا، ىدىس- اياق، ساندىقشالار مەن ءشاي سالتاناتىنا قاجەتتى كەسەلەردى ارلەۋ وندىرىسىندە قولدانىلعان.
