وزگە ۇلت وكىلدەرى جاپپاي قازاق ءتىلىن ۇيرەنىپ جاتىر
ماكسيمنىڭ قازاق تىلىنە دەگەن قىزىعۋشىلىعى مەكتەپ جاسىنان باستاپ ويانعان. ول قازاق تىلىنەن ءتۇرلى وليمپيادالارعا قاتىسىپ ءجۇر.
بۇگىندە ماكسيم قازاق تىلىندە ەركىن سويلەيدى. ول ءتىلدى ۇيرەنۋ ءۇشىن بار جاعداي بارىن، وزگەلەرمەن تاجىريبە جۇزىندە قازاقشاڭدى دامىتۋعا كەرەمەت مۇمكىندىك بارىن العا تارتتى. ماكسيمنىڭ اجەسى دە قازاق تىلىنەن قۇرمەتتى مۇعالىم اتانعان.
لاتينا ساتاروۆا ۇيعىر وتباسىندا دۇنيەگە كەلگەن. دەگەنمەن اناسى ونى جاستايىنان قازاق تىلىنە باۋلىعان.
«قازاق ءتىلىن بالالار باقشاسىنان ۇيرەنە باستادىم. ول باقشاداعى بالالاردان ماعان قازاقشا ۇيرەتۋىن سۇراعان. الايدا، كەرىسىنشە مەن ولاردى ورىسشاعا ۇيرەتىپ تاستادىم. مەكتەپتە جانە ۇيدە ۇيرەتۋشى جالداپ قازاق ءتىلىن مەڭگەردىم»، - دەپ ەسىنە الدى لاتينا.
اناسى لاتيناعا قازاق ءتىلى وزگە تىلدەردەن الدەقايدا ماڭىزدىراق ەكەنىن تۇسىندىرگەن. اقىرى بويجەتكەن قازاققا تۇرمىسقا شىعىپ، ناعىز قازاقءتىلدى ورتاعا تاپ بولدى. ءوزى قازاق ءتىلىن ءالى تولىق مەڭگەرە الماسا دا، ۇلىنىڭ تازا قازاقشا سويلەتىنىن ماقتانىشپەن ايتادى.
تانىمال تەلەجۇرگىزۋشى ناتاليا رايم دا (ورىس) قازاق ءتىلىن مەكتەپ قابىرعاسىنان باستاپ ۇيرەنگەن. ول ءتىلدى مەڭگەرۋىنە كوپ ۇلەس قوسقان مۇعالىمى باەس ۇمبەت ۇلىنا العىسىن جاۋدىرۋدا.
مەكتەپتەن كەيىن قازاق ءتىلى جايىنا قالعانىمەن، «31 - ارناداعى» قىزمەتى كەزىندە ءتىلدى جەتىك مەڭگەرۋ ماسەلەسى الدىنان شىققان.
«جاڭالىقتاردى ەكى تىلدە بىرىكتىرىپ جۇرگىزۋ كەزىندە قازاق ءتىلىن مەڭگەرۋ قاجەت ەكەنىن ءتۇسىندىم»، - دەپ ەسىنە الدى ناتاليا.
ءۇشىنشى بالاسىنا جۇكتى بولىپ، دەكرەتتىك دەمالىسقا شىققان رايم قازاق ءتىلىن ۇيرەنۋگە بار كۇشىن سالادى. ءتىپتى ۇلىن دا ءتىلدى مەڭگەرۋگە باعىتتايدى.
«بالالارمەن ۇيدە تىم قۇرىماسا ءبىر ساعات قازاق تىلىندە سويلەۋگە تىرىستىم. بالالار ءۇشىن بۇل ويىن سەكىلدى كورىنىپ، كوڭىلدەرىنەن شىقتى. كۇيەۋىممەن ءبىلىمىمىزدى تەكسەرىپ وتىردىق»، - دەيدى ناتاليا.
بۇگىندە ول ارىپتەستەرى قازاق تىلىندە جيىن ۇيىمداستىرعان ساتتە ولاردىڭ تالقىلاۋلارىنىڭ 70 پايىزىن ءتۇسىنىپ وتىراتىنىنا قۋانىشتى. رايم قازاقشاسىن ءالى دە جاقسارتا تۇسپەك.
دەرەككوز: Nur.kz
