وليمپيادا استانالارىن تاڭداۋعا قاتىستى داۋ تۋدى

بۇل تۋرالى euronews.com-عا سىلتەمە جاساعان egemen.kz ءتىلشىسى حابارلادى.

مۇنداي ىسكە IAAF- تىڭ (جەڭىل اتلەتيكا فەدەراتسيالارىنىڭ حالىقارالىق قاۋىمداستىعى) بۇرىنعى پرەزيدەنتى لامين دياكتىڭ ۇلى پاپ ماسسات دياكتىڭ ارەكەتى سەبەپ بولىپ وتىر. ءتيىستى ورىنداردىڭ ايتۋىنشا، ول قاجەتتى ۇمىتكەرگە داۋىس بەرۋگە دايىن بولعان ح و ك (حالىقارالىق وليمپيادا كوميتەتى) مۇشەلەرىنە سالەمدەمە جىبەرگەن بولۋى مۇمكىن. قازىرگى تاڭدا ماسسات دياككا ينتەرپول ارقىلى ىزدەۋ جاريالاندى. بۇگىندە ونىڭ سەنەگالدا ەكەنى بەلگىلى بولسا دا، اتالعان ەل كىشى دياكتى ەكستراديسيالاۋدان باس تارتىپ وتىر.

ال ح و ك- تىڭ وكىلى مارك ادامس داۋىس بەرۋ كەزىندە جەمقورلىق نەمەسە پاراقورلىقتىڭ قاتىسى بولعانىن جوققا شىعارۋدا. ول بۇل جونىندە: «قازىرگى كەزدە مۇنداي ءىستىڭ بولعانىنا ەشقانداي دالەل جوق. ەگەر ايعاق دۇنيەلەر تابىلسا، ءبىز دە ءوز تاراپىمىزدان ارەكەت ەتەمىز»، - دەدى.

ايتا كەتەيىك، 2016 -جىلعى، ياعني، بيىلعى وليمپيادا برازيليانىڭ ريو- دە- جانەيرو قالاسىندا وتسە، ءتورت جىلدان كەيىن ويىندار الاۋى جاپونيا استاناسى - توكيو قالاسىندا تۇتانادى.

ريو ويىندارىنىڭ باستالۋىنا بار بولعانى بەس ايعا جۋىق ۋاقىت قالدى. ەگەر برازيليانىڭ وليمپيادانى وتكىزۋ مارتەبەسىن ادىلەتسىز جولمەن يەمدەنگەنى دالەلدەنسە، ءىستىڭ قالاي ءوربيتىنى بەلگىسىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى