قىزى ارلى حالىقتىڭ جىگىتتەرى دە نامىسشىل
قولعا تۇسكەن قىزداردىڭ بارلىعىنىڭ ارى تازا، پاك، ۇياتتى ەكەن. بۇنى بىلگەن فاشيزمنىڭ يدەولوگتارى: «بۇل حالىقتى جەڭۋ قيىن بولار، ويتكەنى، قىزى ارلى بولعان حالىقتىڭ جىگىتى نامىسشىل كەلەدى» دەگەن ەكەن.
نامىسشىل جىگىت ولىمنەن قورىقپايدى، ولىمنەن قورىقپاعان ادام جەڭىلمەيدى. ولەرمەندىكتىڭ ار جاعىندا نامىسشىلدىق جاتىر. نامىسشىلدىقتىڭ ار جاعىندا ارلىلىق جاتىر. ال، ەندى وسىنشاما ەن بايلىقتىڭ ۇستىندە وتىرعان قازاقتى قۇرتۋدىڭ ەڭ توتە جولى - ارىن الۋ. ول ءۇشىن قىزىن بۇزباق كەرەك.
ياعني، قىز ۇياتى - قاۋىمنىڭ نامىسى. قىز ابىرويىن قورۋ، قورعاۋ - ءاربىر ەر ازاماتقا سىن. قورۋ، قىزعانۋ وزىنە اياۋلى بولعان دۇنيەنى وزگەگە قيماعاندىقتان بولاتىن سەزىم. بىرەۋ بىرەۋدەن اتاقتى، اقشانى، باقتى قىزعانادى. بۇل - پەندەشىلىك. ال ەلىن، جەرىن، قىزىنىڭ ارىن قورۋ، ول - ازاماتتىق!
بۇل - ءبىر وتىرىستا بەكبولات تىلەۋحان اعامىزدىڭ ايتقانى ەدى. شىنىمەن دە، قىز تاربيەسى قازاق قوعامىندا ماڭىزدى. وتكەن جىراۋلاردىڭ پوەزياسىن پاراقتاپ وتىرساڭ «العان جارىڭ قىلىقتى بولسىن» دەگەن وسيەتكە ەرىكسىز كوزىڭ تۇسەدى. بۇقار بابامىزشا ايتساق، «قىزدا قىلىق بولماسا، قۇر شىرايدان نە پايدا؟» سوندا «قىلىقتى بولۋ» دەگەن نە نارسە؟
كوپ جاعدايدا قىلىقتىلىقتى قىلىمسۋمەن شاتاستىرامىز. شىن مانىندە، قىلىقتىلىق - قىزدارعا قويىلاتىن ءبىر تالاپ. قىلىقتى ايەلمەن ءومىر ءسۇرۋ قىزىعىراق دەپ جاتادى. سوندىقتان دا قىزدارىمىز قىلىقتى، ۇلدارىمىز بىلىكتى بولسىن اعايىن.
ولجاس قاھارماننىڭ «WeChat» پاراقشاسىنان
