مينسترلىك قازاقستاندا جاس عالىمدار سانى ارتىپ كەلەدى دەيدى

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر ءبىلىم جانە عىلىم مينسترلىگى (ب ع م) «عىلىم قورى» ا ق پرەزيدەنتى اماندىق تولەشيەۆ ءمالىم ەتتى.

«عىلىمي قىزمەتكەرلەر سانىنىڭ ءوسۋى ءۇردىسى بەلگىلەندى، ياعني 2011 -جىلداعى 18 مىڭنان 2014 -جىلى 25,8 مىڭعا دەيىن (1,4 ەسەگە) ارتتى. سونىمەن قاتار عىلىمعا باعىت العان جاستار دا كوبەيدى. اتاپ ايتقاندا، 35 جاسقا دەيىنگى عالىمداردىڭ سانى 2011 -جىلعى 6487 دەن 2014 -جىلى 9447 گە دەيىن جەتتى، بۇل تۇرعىدا ءوسىم 1,5 ەسەنى قۇراپ وتىر»، - دەدى ا. تولەشەۆ.

وسى ورايدا ول Thomson Reuters (ا ق ش)، Springer (گەرمانيا)، Elsevier (نيدەرلاند) سەكىلدى الدىڭعى قاتارلى كومپانيالارمەن جانە باسىلىمدارمەن ەلدىك ليتسەنزياعا قول قويۋ ناتيجەسىندە مەملەكەت الەمدىك اقپاراتتىق رەسۋرستارعا اقىسىز قولجەتىمدىلىكتى قامتاماسىز ەتكەنىن ەسكە سالدى.

«وسى ورايدا قازاقستان عالىمدارىنىڭ حالىقارالىق رەيتينگتى باسىلىمداردا عىلىمي ماقالالاردى جاريالاۋ دەڭگەيى ايتارلىقتاي ارتقانى بايقالادى. 2014 -جىلى حالىقارالىق جۋرنالداردا 2 784 عىلىمي ماقالا جاريالاندى، بۇل ءوز كەزەگىندە الداعى جىلعا قاراعاندا 1,5 ەسەگە ارتىق بولدى»، - دەيدى ول.

 ونىڭ ايتۋىنشا، 2015 -جىلى رەسپۋبليكالىق بيۋدجەتتەن عىلىمدى قارجىلاندىرۋدىڭ جالپى سوماسى 43,6 ميلليارد تەڭگەنى قۇرادى. 2016 -جىلى وسى باعىتقا قارجى ءبولۋ دەڭگەيى بىلتىرعى كولەمدە ساقتالادى دەپ كۇتىلۋدە.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى