گۇلدى بارلىق قىز جاقسى كورە مە؟
الايدا سۇلۋلارىنا ەشقانداي سەبەپسىز ءار كەزدەسۋىندە گۇل سىيلايتىن جىگىتتەر دە از ەمەس. ويتكەنى گۇل - سۇيىكتىڭىزگە كوڭىل ءبولىپ، وعان شىنايى عاشىق ەكەنىڭىزدى بىلدىرەدى. سوندىقتان قىز بىتكەننىڭ بارلىعى دا گۇلدى ۇناتادى. جىگىتىنىڭ گۇلىن قابىل الماعان قىز جوقتىڭ قاسى.
دەگەنمەن قىزداردىڭ گۇلگە دەگەن ءتۇرلى پىكىرى بار. ەگەر قىزىڭىزعا ءبىرىنشى رەت گۇل سىيلايىن دەپ جاتساڭىز، ول قانداي گۇلدى ۇناتاتىنىن انىقتاپ العانىڭىز ابزال. سەبەبى كەي گۇلدەردىڭ يىسىنەن قىزداردىڭ اعزاسى تىتىركەنىپ (اللەرگيا)، رومانتيكالىق كەشىڭىزدىڭ بىت-شىتى شىعادى. ءبىز بۇگىن ءبىر توپ قىزدان گۇلدى نە ءۇشىن ۇناتاتىنىن نە ۇناتپايتىنىن سۇراپ بىلدىك.
جاڭاگۇل شىڭعىسحان قىزى: گۇل - تابيعاتتىڭ ەڭ نازىك، ەڭ ادەمى، ەڭ ەرەكشە جاراتىلعان وسىمدىگى. سوندىقتان قىزدار قاۋىمى عانا ەمەس، بارلىق ادامزاتقا ەرەكشە ۇنايتىن وسىمدىك بولعاندىقتان، ونى سىي رەتىندە، كوڭىلدىڭ سيمۆولى رەتىندە قابىلدايمىن. جولداسىم بولمە گۇلدەرىن ءجيى سىيلايدى.
دانيا كۇزەمبايەۆا: مەنىڭشە گۇلدىڭ ورنىنا ءيىسسۋ سىيلاعان الدەقايدا جاقسى. سەبەبى گۇلدىڭ عۇمىرى وتە قىسقا. ال ءيىسسۋ ەستەلىك رەتىندە كوپ ۋاقىتقا دەيىن ساقتالادى. ءبىراق گۇلمەن سۋرەتكە ءتۇسىپ، الەۋمەتتىك جەلىدە بولىسكەندى جاقسى كورەمىن.
شولپان جابايەۆا: گۇل - مەن ءۇشىن سۇلۋلىقتىڭ سيمۆولى. مەن ونى نە ءۇشىن ۇناتاتىنىمدى تۇسىندىرە المايمىن، تەك قانداي گۇلدى ۇناتاتىنىمدى ايتا الامىن. ماعان قىزعالداق پەن لالاگۇل وتە ۇنايدى.
ءمولدىر قالىقوۆا: جىگىت باعالى سىيلىقتارعا قاراعاندا، گۇل سىيلاعانى ماعان شىنايى ىقىلاسىن بىلدىرەدى دەپ تۇسىنەمىن. ويتكەنى گۇل سىيلاعان ساتتە كوڭىل-كۇيىم ەرەكشە كوتەرىلەدى.
ماقپال بيسەمبايەۆا: مەن گۇلدەردى ادامعا سىيلاعاننان گورى، ونىڭ جەردە ءوسىپ تۇرعانىن قالايمىن. مەرەكە كەزىندە جىگىت قىزعا دەگەن قۇرمەتىن باسقا سىيلىقتارمەن دە كورسەتە الادى. ماسەلەن، ءاتىر نەمەسە اشەكەي بۇيىمدار دا كەز كەلگەن قىزدىڭ كوڭىلىنەن شىعاتىن سىيلىق. دەگەنمەن، سىيلىققا گۇل الىپ جاتسام، ونى كەيىن قايتارمايمىن.
كاۋسار كارىموۆا: گۇلدى ۇناتپايتىن ارۋ جوق دەسەك، ارتىق ايتقاندىق ەمەس. سەبەبى گۇلدىڭ نازىك جانى قىزدىڭ ىشكى دۇنيەسىمەن ۇندەسەدى. ونىڭ جۇپار ءيىسى، تارتىمدى ءتۇرى كەز كەلگەن كىسىگە جاعىمدىلىق سىيلايدى. تارتۋ ەتكەن ادامنىڭ شىنايى كوڭىلىن بىلدىرەدى. كورگەن كىسىگە بىردەن زور قۋانىش سىيلايتىن تىلسىم كۇشى بار. سوندىقتان جىگىتتەر، قىزدارعا ءجيى-ءجيى، ەش سەبەپسىز گۇل سىيلاپ، قۋانتىڭىزدار!
massaget.kz
