جەتىسۋدا دەپورتاتسيالانعان ۇلتتاردىڭ ۇرپاقتارى قازاق حالقىنا العىس ايتتى - فوتو
مەرەكەلىك شاراعا قاتىسۋشىلاردى وبلىس اكىمىنىڭ ورىنباسارى باقتيار ونەربايەۆ قۇتتىقتادى.
ب. ونەربايەۆتىڭ مەملەكەت باسشىسى جۇرگىزىپ وتىرعان ساياساتتىڭ ارقاسىندا ەلىمىزدەگى كوپتەگەن ۇلىستاردىڭ باسىن بىرىكتىرەتىن تولەرانتتىلىقتىڭ تەڭدەسسىز ينستيتۋتى قازاقستان حالقى اسسامبلەياسى قۇرىلعانىن، العىس ايتۋ كۇنىنىڭ پرەزيدەنت جارلىعىمەن ءدال اسسامبلەيانىڭ قۇرىلعان كۇنىنە وراي بەلگىلەنۋى بارلىق ەتنوستاردىڭ ءبىر- بىرىنە دوستىق كوڭىل مەن باۋىرلاستىق پەيىلدەرى ءۇشىن ريزاشىلىق بىلدىرۋىنە مۇمكىندىك بەرەتىنىن اتاپ ءوتتى.
«قۇرمەتتى جەرلەستەر! مەرەكەلەرىڭىز قۇتتى بولسىن! وسى ايتۋلى مەرەكەمەن بارشاڭىزدى شىن جۇرەكتەن قۇتتىقتايمىن. سىزدەرگە مىقتى دەنساۋلىق، بەيبىت ءومىر تىلەيمىن. بۇگىنگى العىس ايتۋ كۇنى بارشاڭىزعا قۋانىش سىيلاسىن! ەلىمىز امان، جۇرتىمىز تىنىش بولسىن!»، - دەدى ب. ونەربايەۆ.
ءسوز العان قازاقستان حالقى اسسامبلەياسىنىڭ مۇشەسى، وبلىستىق «وگني الاتاۋ» گازەتىنىڭ باس رەداكتورى اساليم يديگوۆ، تالدىقورعان كورەيلەرى اسسوتسياتسياسىنىڭ اقساقالدار كەڭەسىنىڭ ءتوراعاسى ا. كيم، وبلىستىق ارداگەرلەر كەڭەسىنىڭ ءتوراعاسى ا. سىدىق قازاقستانعا رەپرەسسيا جىلدارىندا ءتۇرلى ۇلت وكىلدەرىنىڭ دەپورتاتسيالانۋ تاريحىنا توقتالىپ ءوتتى. ءاربىر سويلەۋشى ءوز سوزىندە قازاق حالقىنىڭ قوناقجايلىعى، توزىمدىلىگى مەن مەيىرىمدىلىگى جەر اۋدارىلىپ كەلگەن ەتنوس وكىلدەرىنە جاڭا دا جارقىن ءومىر سىيلاعانىن ەرەكشە اتاپ ءوتتى.
ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتى ولەسيا تادجيەۆا جاستاردىڭ اتىنان ءسوز الدى. ول جاستاردىڭ ءوز ەلىنىڭ تاريحىن، وتكەنىن قۇرمەتتەيتىنىن، بولاشاققا قازاقستان حالقىنىڭ بەيبىتشىلىك، تۇراقتىلىق، كەلىسىم سياقتى باستى قۇندىلىقتارىن الىپ باراتىندارىن سەنىممەن ايتتى.
مەرەكەگە ارناپ قويىلعان كونسەرتتىك باعدارلامادا قازاقستاندا تۇراتىن ءتۇرلى ۇلت پەن ۇلىستاردىڭ اندەرى شىرقالىپ، بيلەرى بيلەندى. بۇل شارا ەلىمىزدىڭ مادەنيەتى مەن ءداستۇر بايلىعىنىڭ، حالقىمىزدىڭ ۇلىلىعى مەن سۇلۋلىعىنىڭ جارقىن كورىنىسى بولدى.
