ق ر پرەزيدەنتى ەلشىلەردى ءوزارا ءتيىمدى ىنتىماقتاستىقتىڭ مۇمكىندىكتەرىن كەڭىنەن پايدالانۋعا شاقىردى

 «ەلدەرىڭىزدەگى ىسكەر كومپانيالاردى قازاقستانداعى يندۋستريالاندىرۋ، جەكەشەلەندىرۋ باعدارلامالارىنا، ينفراقۇرىلىمدىق نىساندار قۇرىلىسىنا تارتۋعا شاقىرامىن، سىزدەر سوعان سەپتىگىن تيگىزەدى دەپ سەنەمىن. قازاقستان نارىعىنىڭ ءوسۋ الەۋەتىن ەسكەرە وتىرىپ، قازىر ءبىزدىڭ نارىققا ەنەتىن كومپانيالار بولاشاقتا باسىمدىققا يە بولاتىنىن اتاپ وتكىم كەلەدى»، - دەدى مەملەكەت باسشىسى بۇگىن اقوردادا شەتەلدىك ديپلوماتيالىق وكىلدىكتەر باسشىلارىمەن كەزدەسۋدە.

«ءبىز 2016-2018 - جىلدارى داعدارىسقا قارسى ءىس- قيمىل جوسپارىن جۇزەگە اسىرۋعا كىرىستىك. تۇرعىن ءۇي سالۋعا، ينفراقۇرىلىمعا، شاعىن جانە ورتا بيزنەستى دامىتۋعا، جاڭا جۇمىس ورىندارىن اشۋعا قاراجات ءبولىندى. «نۇرلى جول» ينفراقۇرىلىمدىق دامۋ باعدارلاماسى حالىقتىق ەكونوميكالىق بەلسەندىلىگىن ارتتىرۋعا ىقپال ەتەدى. بۇل باعدارلاما بويىنشا 2018 - جىلى ەلىمىزدە 9 شاقىرىمعا جۋىق جول سالىنىپ، بارلىق نەگىزگى جولدار جاڭارىپ، بولاشاققا قىزمەت ىستەيتىن بولادى. بۇل ءوز كەزەگىندە ءبىز ءۇشىن ۇلكەن تاريحي ماسەلە، ەكونوميكاعا زور ىقپالىن تيگىزەدى دەپ سەنەمىن»، - دەدى ن. نازاربايەۆ.

 سونىمەن قاتار ەلباسى كاسپي تەڭىزىندەگى جاڭا تەڭىز پورتتارى قازاقستانعا پارسى شىعاناعىنا، قارا تەڭىزگە شىعۋعا مۇمكىندىك بەرەتىنىن، ول پورتتاردىڭ نەگىزىندە قۇرىلىسى بيىل اياقتالاتىنىن اتاپ ءوتتى.

«استانادا «بولاشاق ەنەرگياسى» تاقىرىبىندا وتەتىن «ەكسپو-2017» دۇنيەجۇزىلىك كورمەسى بالاما ەنەرگەتيكانىڭ جاڭا تەحنولوگيالارى مەن يننوۆاتسيالىق دامۋىنا قۋاتتى سەرپىن بەرەدى. ءبىز اعىلشىن قۇقىعىنا نەگىزدەلگەن تاۋەلسىز زاڭگەرلىك جۇيەسىمەن جەڭىلدەتىلگەن سالىق رەجىمى بار «استانا» حالىقارالىق قارجى ورتالىعىن قۇرۋدامىز. قازاقستانداعى ينۆەستورلار جان- جاقتى مەملەكەتتىك قولداۋعا يە بولادى»، - دەدى پرەزيدەنت.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى