الماتىدا امەريكانىڭ ارناۋلى اگەنتتەرى ەسىرتكى بارونى ەسكوباردى تۇتقىنداۋ قۇپياسىمەن بولىسەدى
بۇل تۋرالى قازاقستانداعى ا ق ش ديپلوماتيالىق ۋاكىلدىگى حابارلايدى.
بەيسەنبى، ناۋرىزدىڭ 10 - كۇنى، ساعات 19:00-دا پەنيا جانە مەرفي كيمەپ ۋنيۆەرسيتەتىنىڭ Great Hall زالىندا كوپشىلىكپەن كەزدەسەدى. ولار كولۋمبيا جانە ا ق ش- تىڭ قۇقىق قورعاۋ ورگاندارىنىڭ ىنتىماقتاستىعى جانە بىرلەسىپ جۇمىس ىستەۋ ناتيجەسىندە 1993 - جىلى «كوكاين پاتشاسى» اتالعان - الەمدەگى ەڭ باي ەسىرتكى ساتۋشى ەسكوباردى تۇتقىنداۋ بارىسىن اڭگىمەلەيدى.
لەكسياعا كىرۋ تەگىن، ورىس تىلىندە ىلەسپە اۋدارما ۇسىنىلادى. سونىمەن قاتار، ساپار بارىسىندا، مەرفي جانە پەنيا ىشكى ىستەر مينيسترلىگى اكادەمياسىنىڭ جانە ۇلتتىق قاۋىپسىزدىك كوميتەتىنىڭ شەكارا قىزمەتى اكادەمياسىنىڭ ستۋدەنتتەرى جانە وقىتۋشىلارىمەن كەزدەسەدى. ولار بىشكەككە ناۋرىزدىڭ 14-15 - كۇندەرى بارادى.
پابلو ەسكوباردى تۇتقىنداۋداعى ءرولى ءۇشىن پەنيا جانە مەرفي ا ق ش پەن كولۋمبيا ۇكىمەتتەرى اتىنان ەڭ جوعارى ماراپاتتارعا يە بولعان. ولاردىڭ مانساپتارىنا وسى وپەراتسيا ايتارلىقتاي اسەر ەتىپ، ونىڭ ناتيجەسىندە كوپتەگەن سىيلىققا يە بولدى. Netflix كومپانياسى تۇسىرگەن «ناركو» تەلەحيكاياسىنداعى اگەنتتەردى سومداعان اكتەرلەر حاۆەر پەنيا مەن ستيۆ مەرفيدى بەينەلەيدى. پەنيا جانە مەرفي تەلەحيكايا ءتۇسىرۋ كەزىندە وعان ساراپشى رەتىندە كەڭەس بەردى.
اتاقتى اگەنتتەردىڭ قازاقستان مەن قىرعىزستانعا ساپارى الماتىداعى ا ق ش ەسىرتكىگە قارسى كۇرەس باسقارماسىنىڭ وڭىرلىك بيۋروسى مەن ورتالىق ازيالىق قۇقىق قورعاۋ ورگاندارى اراسىنداعى حالىقارالىق ەسىرتكى ساۋداسىنا قارسى كۇرەس بويىنشا ىنتىماقتاستىقتىڭ ماڭىزدىلىعىن كورسەتەدى.
