ءار ەتنوستان شىققان استانا سۋرەتشىلەرى «العىس ايتۋ» كۇنىنە وراي قازاقستانعا ارناعان تۋىندىلارىن كورمەگە قويدى - فوتو
«العىس ايتۋ» كۇنىنە جانە ق ر تاۋەلسىزدىگىنىڭ 25 جىلدىعىنا وراي وتكىزىلگەن كورمە «استانا» ۇلتتىق سۋرەت گالەرەياسىندا اشىلدى. سونىمەن قاتار وسىندا «بىرلىك ءتۇبى - بەرەكە» اتتى استانا قالاسىنىڭ سۋرەتشىلەرى جانە ستۋدەنتتەردىڭ قاتىسۋىمەن دوڭگەلەك ۇستەل ءوتتى.
«بۇگىنگى بىرلىك تۋىنىڭ استىندا ءوتىپ جاتقان وسىناۋ مەرەكەنىڭ ماعىناسى وتە جوعارى. سەبەبى ءبىزدىڭ ەلباسىمىزدىڭ باستاماسىمەن كوتەرىلگەن مەيرامدى ءبىزدىڭ ەلىمىزدە ءومىر ءسۇرىپ جاتقان 130 دان استام حالىق پەن ۇلت وكىلدەرى اتاپ وتۋدە. بۇل شارا ناۋرىز مەرەكەسىنىڭ الدىندا ءوتىپ جاتقان، جالپى كوكتەم مەرەكەسىنىڭ جاڭا ءۇردىسى سەكىلدى. ەلباسىنىڭ وسىنداي مەرەكەنى ەلگە الىپ كەلۋىنىڭ استارىندا - حالىق ءبىرىن-ءبىرى دوس كورسىن، ءبىر-ءبىرىن ءارقاشان دا سىيلاپ ءجۇرسىن دەگەن ماعىنا جاتىر. سەبەبى ءبىرىن-ءبىرى سىيلاعان، ءبىرىن-ءبىرى شىن نيەتپەن جاقسى كورگەن حالىق قانا ءوسىپ-وركەندەيدى»، - دەيدى سۋرەتشى جانۇزاق ءمۇساپىر.
تۋىندىلاردىڭ تاقىرىبى ءار ءتۇرلى، قولدانعان جانرلاردا سان الۋان: پورترەتتەر، ناتيۋرمورت، مۇسىندەر. سۋرەت ونەرىنىڭ كلاسسيكادان باستاپ، قازىرگى زامانعا دەيىنگى تەحنيكالارى قولدانىلعان. مۇندا بەلگىلى ءبىر كونتسەپتسيا جوق، ءار سۋرەتشى ءوزىن ەركىن تاقىرىپتا كورسەتۋگە تىرىسقان.
«بۇل كورمە سونىسىمەن دە قىزىقتى، سەبەبى ولاردىڭ تۋىندىلارى ءتۇرلى حالىقتاردىڭ مادەنيەتىنەن سۋسىندايدى»، - دەيدى «استانا» گالەرەياسىنىڭ ءبولىم باسشىسى ەلەنا چەرنوۆا.
ايتا كەتەيىك، بيىل 1- ناۋرىزدا قازاقستان حالقى العاش رەت «العىس ايتۋ» كۇنىن مەرەكەلەۋدە.
