بىرلەسكەن اراپ امىرلىگى پرەزيدەنتى اكىمشىلىگىنىڭ باسشىسى امىرلىك-قازاقستاندىق ىنتىماقتاستىققا قوسقان ۇلەسى ءۇشىن ماراپاتتالدى
2015-جىلدىڭ قاراشاسىندا قايىرىمدىلىق قورىنىڭ پرەزيدەنتى شەيح مانسۋر بەن زايد ءال ناحاياننىڭ شاقىرۋىمەن 60 قازاقستاندىق قولونەر شەبەرى جانە ۇلتتىق تاعامدى دايىنداۋ مامانى قولونەر شەبەرلەرىنىڭ حالىقارالىق مادەني فەستيۆالىنە قاتىستى. ءابۋ-دابي فەستيۆالىندەگى قازاقستاندىق ەتنواۋىل قازاقستان حالقى اسسامبلەياسىنىڭ 20 جىلدىعى مەن قازاق حاندىعىنىڭ 550 جىلدىعىنا ارنالدى. قايىرىمدىلىق قورىنىڭ 13 ميلليون دوللار كولەمىندەگى گرانتىنىڭ ارقاسىندا استانادا 1200 ورىنعا شاقتالعان قازاق-امىرلىك زياتكەرلىك مەكتەبىنىڭ قۇرىلىسى ءجۇرىپ جاتىر.
ماراپاتقا يە بولعان شەيح مانسۋر بەن زايد ءال ناحايان پرەزيدەنت نۇرسۇلتان نازاربايەۆتىڭ باسشىلىعىمەن قازاقستان ازاماتتىق قوعامدا ەتنوسارالىق جانە كونفەسسياارالىق كەلىسىمدى ساقتاۋ جانە نىعايتۋ مەملەكەتتىڭ دامۋى ءۇشىن تاڭدالعان دۇرىس جول ەكەنىن بۇكىل الەمگە دالەلدەگەنىن اتاپ ءوتتى.
شەيح مانسۋر بەن زايد ءال ناحايان قازاقستاندىق-امىرلىك قارىم-قاتىناستاردىڭ بۇگىنگى جاي-كۇيىنە وڭ باعاسىن بەردى جانە بىرلەسكەن اراپ امىرلىگى بيلىگى ەكى ەل اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋعا نيەتتى ەكەنىن جەتكىزدى.
اتاپ وتەيىك، «قازاقستان حالقى اسسامبلەياسىنا 20 جىل» مەرەكەلىك مەدالىمەن ەلدەگى قوعامدىق كەلىسىمنىڭ نىعايۋىنا، قازاقستان حالقى بىرلىگىن قامتاماسىز ەتۋگە، قازاقستان حالقى اسسامبلەياسى ءرولىنىڭ ارتۋىنا، قازاقستاننىڭ بەيبىتشىلىك پەن كەلىسىم تاجىريبەسىن شەت ەلدەردە تاراتۋعا جانە قازاقستان مەن وزگە مەملەكەتتەر حالىقتارى اراسىنداعى دوستىق قاتىناستاردى دامىتۋعا ەلەۋلى ۇلەس قوسىپ جۇرگەن قازاقستان رەسپۋبليكاسىنىڭ ازاماتتارى جانە شەتەل ازاماتتارى ماراپاتتالدى.
