تاجىكستانداعى قىشلاق اقىنى نازاربايەۆقا ولەڭ ارنادى
ناۋرىزدىڭ 1 ءى كۇنى «ازاتتىقتىڭ» تاجىك قىزمەتى «سايدجالول كاريمزودا نۇرسۇلتان نازاربايەۆقا ارناعان ولەڭدەرىنە سىيلىق رەتىندە قازاق شاپانى، ايىرقالپاق، قازاقستان گەربى جانە مىڭ سوموني (تاجىكستان اقشاسى) الدى» دەپ جازدى.
ءتىلشىنىڭ جازۋىنشا، شەت مەملەكەت باسشىسى ءبىرىنشى رەت قىشلاق اقىندارىنىڭ ولەڭدەرىن باعالاپ، سىيلىق جاساپ وتىر.
ازاتتىقتىڭ تاجىك قىزمەتىنە سۇحبات بەرگەن دوماناكۋح قىشلاعى تۇرعىنى سايدجالول كاريمزودا «قاراپايىم ولەڭدەرىن بىلتىر جازدا جازىپ، نۇرسۇلتان نازاربايەۆتىڭ پوچتا ادرەسىنە سالىپ جىبەرگەنىن» ايتادى.
«مەن ەشقانداي سىيلىق كۇتپەگەن ەم، جالپى ەشقاشان ولەڭدەرىمە بولا سىيلىق دامەتكەن ەمەسپىن. ال بۇل جولى... جالپى مەن نازاربايەۆتى ءادىل پاتشا دەپ سانايمىن، سوندىقتان ولەڭ ارنادىم» دەيدى اقىن.
قازاق پرەزيدەنتى تۋرالى سايدجالول كاريمزودانىڭ ولەڭدەرى وتە قاراپايىم، ءتىپتى حالىق فولكلورىنا دا ۇقسايدى. ماسەلەن، ول ولەڭدەردىڭ ءبىر شۋماعى مىناداي (جولما-جول اۋدارما):
«نۇرسۇلتان نازارباي
سۇلتاندار اراسىندا باي!
بارشاعا سەن نان بەردىڭ،
ادامدارعا جان بەردىڭ!
ءمارتسىڭ سەن مەيىربان،
جانىمىز ساعان قۇربان.
عاجايىپ جۇزىڭنەن
جىلىلىق توگىلگەن.
اتىڭ جاقسى نۇرسۇلتان
سەنى ۇناتار كۇللى جاھان»
بۇعان قاراماستان، قازاقستان پرەزيدەنتى اكىمشىلىگى تاجىكستانداعى قازاق ەلشىلىگى ارقىلى اقىنعا شاپان، ايىرقالپاق، قازاقستان گەربىن، مىڭ سوموني بەرىپ جىبەرگەن.
بۇل سىيلىقتار مەن قازاق پرەزيدەنتىنىڭ حاتىن سايدجالول كاريمزودا اۋداندىق مۋزەيگە تاپسىرعان. «مەن سىيلىق العاننان كەيىن ريزا بولىپ، نۇرسۇلتان نازاربايەۆ تۋرالى تاعى ءۇش عازال مەن ءتورت شۋماق ولەڭ جازدىم» دەيدى اقىن.
سايدجالول كاريمزودا تاجىكستان پرەزيدەنتى ەمومالي راحمونعا دا كوپ ولەڭدەرىن ارناعان. ءوزىنىڭ ايتۋىنشا، ول ولەڭدەردىڭ سانى شامامەن 100 گە تاياعان، ءبىراق ولاردى كىتاپ ەتىپ باسىپ شىعارۋعا قاراجاتى جوق. حالىق اراسىنان شىققان اقىن فارحور اۋدانى حۋكۋماتىنا (اكىمدىگىنە) كومەك سۇراپ حات جازعان، ەندى جاۋاپ كۇتىپ وتىر.
سايدجالولا كاريمزودانىڭ سوزىنە قاراعاندا، ول ولەڭدى بالا كەزىنەن شىعارادى. ونىڭ شىعارمالارى جەرگىلىكتى گازەتتەرگە ءجيى جاريالانىپ تۇرادى.
قىشلاق اقىنى «ءادىل پاتشا» نۇرسۇلتان نازاربايەۆ تۋرالى كىتاپ جازعىسى كەلەدى. ول كىتاپتى جازىپ بىتىرسەم دەپ، ونى استاناعا، قازاق پرەزيدەنتىنىڭ اكىمشىلىگىنە پوچتا ارقىلى جونەلتسەم دەپ ارماندايتىنىن ايتتى.
