قازاق حالقىنىڭ جاقسىلىعىن ۇمىتپايمىز - مۋداريس ابدۋللين
ونىڭ ايتۋىنشا، وسى كۇنى تاۋەلسىز ەلدىڭ ازاماتى رەتىندە كەز كەلگەن قازاقستاندىقتىڭ ءبىر- بىرىنە العىس ايتىپ، اق نيەت، يگى تىلەكتەر تىلەپ، ەلدىڭ ىنتىماعى مەن بىرلىگىن اسقاقتاتۋ پارىزى. ازاماتتىق تاتۋلىق پەن ۇلتارالىق كەلىسىم ءبىزدىڭ باستى قۇندىلىعىمىزعا اينالىپ وتىر. ءتۇرى باسقا بولسا دا، جۇرەگى ءبىر، ءتىلى باسقا بولسا دا، تىلەگى ءبىر ءار ۇلت وكىلدەرى ورتاق مۇددە جولىندا جاراستىقتىڭ ءدامىن سەزىنىپ، تابىستى ەل بولۋ ماقساتىن ۇستانۋى قاجەت.
«قۇشاعى كىم- كىمگە دە ايقارا اشىق، باۋىرمال دا قوناقجاي قازاق جەرىندە تاتارلاردىڭ وتىزعا جۋىق ەتنو- مادەني بىرلەستىكتەرى تىركەلگەن بولسا، ولاردىڭ ساناتىندا كوكشەتاۋداعى تاتار مادەنيەتى ورتالىعى دا بار.
بۇگىنگى كۇنى وسى ورتالىقتاعى تاتارلار مەن باشقۇرتتار وزگە ۇلىستارمەن بىرگە ەڭبەك ەتىپ، تاۋەلسىز ەلىمىزدىڭ ەكونوميكاسىن دامىتۋعا ءوز ۇلەستەرىن قوسۋدا. سوناۋ قيىن- قىستاۋ كەزەڭدە قوناقجاي قازاق حالقى شاڭىراقتارىنىڭ استىنا الىپ، ءبىر ءۇزىم نانىمەن بولىسكەن قازاق حالقىنىڭ جاقسىلىعىن ۇمىتپايمىز»، دەيدى م. ابدۋللين.
ەسكە سالا كەتسەك، تاتارلار كوكشەتاۋ وڭىرىنە 1824 - جىلدان باستاپ قونىس اۋدارىپ، 1841 - جىلى ايىرتاۋ اۋدانىنا قاراستى يمانتاۋ، 1908 - جىلى زەرەندى اۋدانىنا قاراستى جەلتاۋ ەلدى مەكەندەرىنىڭ ىرگەتاسىن قالاعان ەكەن. مۇندا ولار دۇكەن مەن دۇڭگىرشىكتەر اشىپ، كۇندەلىكتى تۇتىناتىن تاۋارلار ساتقان كورىنەدى. سونداي- اق، تاتارلاردىڭ تەرى يلەيتىن، كوكونىس تۇزداپ، توساپ قايناتاتىن، قوي ءجۇنىن وڭدەيتىن جانە وزگە دە كاسىپورىندارى بولىپتى. كوكشەتاۋدا دا ءبىرقاتار كاسىپورىندار مەن ساۋدا ۇيلەرىن تاتارلار باسقارعان. 1907 -جىلى يمانتاۋ ەلدى مەكەنىندە 22 جەل جانە 4 سۋ ديىرمەنى جۇمىس ىستەگەن.
بۇگىنگى تاڭدا اقمولا وبلىسى كولەمىندە 17 مىڭعا، وبلىس ورتالىعىندا ءۇش مىڭعا جۋىق تاتار تۇرادى. قازىر قاسيەتتى قازاق جەرىن مەكەندەيتىن جەرگىلىكتى ۇلت پەن تاتار، باشقۇرت ۇلىستارىنىڭ اۋىزبىرلىگى جاراسىپ، بەيبىت ءومىر سۇرۋدە.
اۆتور: اسلان وسپانوۆ
