يزرايل تۇرعىندارى قازاقستانعا شەكسىز العىس بىلدىرەدى - كەسكىن
مىڭداعان ادام قازاق حالقىنىڭ قوناقجايلىعى مەن تۇسىنىسپەنشىلىگىنىڭ ارقاسىندا ءتۇتىن تۇتەتىپ، امان قالدى. سەمەن ياكۋبوۆتىڭ ءۇيى يزرايلدەگى ەرەكشە وتباسىلاردىڭ ءبىرى، ويتكەنى ونىڭ شاڭىراعىنداعىلاردىڭ بارلىعى قازاق تىلىندە سويلەيدى.
كەلگەن قوناققا قوناقجايلىلىق تانىتىپ، كەسەمەن شاي ۇسىنادى. سەمەن ياكۋبوۆتىڭ يزرايلدە تۇرىپ جاتقانىنا 20 جىلدان اسسا دا، قازاق جەرىن كادىمگىدەي ساعىنادى.
سەمەن ياكۋبوۆ، تەل-اۆيۆ قالاسىنىڭ تۇرعىنى:
- تۇركىستاندا بىردە-ءبىر ەۆرەي قالعان جوق. ءبىزدىڭ زيراتقا جاقىن دوستارىمىز قارايلاپ جۇرەدى. قازاقستاندا وتە مەيىرىمدى جانداردىڭ كوپتىگى تاڭقالدىرادى ءارى ماقتانىش سەزىمدى وياتادى.
تاريحي دەرەكتەر بويىنشا ەۆرەيلەر قازاق جەرىنە العاش رەت XV عاسىردا قونىستانعان. ولاردىڭ قاتارى ستالين رەپرەسسياسى مەن ۇلى وتان سوعىسى كەزىندە ايتارلىقتاي ارتىپتى. سيما كوفماننىڭ جانۇياسى دا سۇراپىل سوعىستان قاشىپ، ەلىمىزدەن پانا ىزدەگەن. ايتۋىنشا، بالالىق شاعىندا قازاق تىلىندە ەركىن سويلەپ، ۇلتتىق ءبي بيلەگەن.
سيما كوفمان، تەل-اۆيۆ قالاسىنىڭ تۇرعىنى:
- قانشا ادام كوشىپ كەلگەنىمەن، بىزگە بارىنشا كومەك كورسەتىپ، قاۋىپسىز جەردە ەكەنىمىزدى تانىتتى. ءتىپتى كەرەك-جاراقتىڭ بارلىعىن اكەپ بەردى. مەن قازاقستانعا شەكسىز العىسىمدى بىلدىرەمىن. ەگەر وتە مەيىرىمدى قازاق حالقى بولماسا، مىڭداعان ادام بۇگىنگى كۇنگە جەتپەس تە ەدى.
قازاقستاندا تۇرعان ەۆرەيلەر يزرايلدە ارنايى قوعامدىق ۇيىم قۇرعان. ولار ءداستۇر بويىنشا ناۋرىز، تاۋەلسىزدىك كۇنى مەن ۇلتتار دوستىعى مەرەكەسىن تويلايدى. ەكى ەل ىنتىماقتاستىعىن دامىتۋعا دا ۇلەس قوسادى.
ميحاەل برودسكي، يزرايل مەملەكەتىنىڭ قازاقستانداعى توتەنشە جانە وكىلەتتى ەلشىسى:
- قازىر يزرايلدە، كەزىندە قازاقستاندا تۇرعان ازاماتتار وتە كوپ. ولار قازاق حالقىنا شەكسىز العىسىن بىلدىرەدى. ونىڭ ۇستىنە، بيىل ەۆرەيلەردىڭ قازاقستانعا قونىس اۋدارعانىنا 75 جىل تولىپ وتىر. كوپتەگەن ادامدار قازاق جەرىنەن پانا تاۋىپ قانا قويماي، ءوزىنىڭ جاڭا ۇيىنە، دوستارىنا يە بولدى.
مىڭداعان ەۆرەيلەر قازاق جەرىن وتانىم دەپ اتايدى. «قىز جىبەك»، «ايمان- شولپان» وپەرالارىنىڭ اۆتورى، كومپوزيتور ەۆگەني برۋسيلوۆسكي. نۇرسۇلتان نازاربايەۆ تاعايىنداعان بەيبىتشىلىك جانە كەلىسىم پرەمياسىنىڭ لاۋرەاتى جازۋشى موريس سيماشكو. بۇل ازاماتتاردىڭ شىعارمالارى قازاق حالقىنىڭ شەكسىز مەيىرىمدىلىگىن، ءاربىر پەندەگە قولداۋ كورسەتۋگە دايىن ەكەندىگىن ايقىنداي تۇسەدى.
24.kz
