قازاقستان تەلەارناسىندا ناۋرىز جۇلدىزى انىقتالادى
ناۋرىز مەيرامى اتا- بابا داستۇرىمەن ساباقتاسقان جالپى تۇركى تىلدەس حالىقتارىنا ورتاق مەرەكە. تۇركى تىلدەس حالىقتاردىڭ ءارقايسىسىندا ناۋرىز مەيرامىن تويلاۋدىڭ ءوز ەرەكشەلىكتەرى بار. بۇل كۇنى رەنجىسكەن ادامدار تاتۋلاسىپ، ءبىر- بىرىنە كەشىرىممەن، مەيىرىمدىلىكپەن قارايدى. بارشا جۇرت ادەمى كيىنىپ، بي بيلەپ، ءان سالادى. اقساقالدار باتا بەرىپ، جاقسى تىلەكتەر ايتىلادى.
قازاق حالقى قاشاندا شەبەرلىگىمەن، شەشەندىگىمەن، «جاقسى ءان مەن ءتاتتى كۇيلەرىمەن» ەرەكشەلەنەتىن. قازاقتا «ءاۋ» دەمەيتىن، سونداي- اق دومبىرا شەرتپەيتىن ادام كەمدە- كەم.
قازاقتىڭ بار بولمىسى انمەن ورىلگەن. ءان توي- دۋمانداردا دا، سالت- داستۇرلەردە، سونىمەن قاتار جوقتاۋلاردا دا جالعاسىن تاپقان.
قازاقتىڭ كۇي ونەرى كەڭ دالانىڭ تىنىسىمەن قاتار ورىلگەن اۋەندى ساز. مۇنداي ونەر باسقا حالىقتاردا جوق.
«قازاقستان» ۇلتتىق تەلەارناسىندا باستاۋ العان «ناۋرىز جۇلدىزى» بايقاۋىنىڭ ماقساتى قازاق حالقىنىڭ سالت- داستۇرلەرىن كەڭىنەن ناسيحاتتاپ، ولاردى جاس ۇرپاقتى تاربيەلەۋدە پايدالانۋ. بايقاۋ جەڭىمپازى «قازاقستان» ۇلتتىق تەلەارناسى ارقىلى ءوز ونەرىن بارشا حالىققا پاش ەتۋ مۇمكىندىگىنە يە بولادى، دەپ حابارلادى «قازاقستان» ر ت ر ك» ا ق باسپا ءسوز قىزمەتى.
حالىق دانالىعىندا ادام ءوز ونەرىن، تۇرمىس- مادەنيەتىن تەرەڭ سەزىنە بىلگەن سايىن باسقا حالىقتاردىڭ ونەرىن، مادەنيەتىن تۇسىنەدى دەگەن ۇعىم بار.
ەستەرىڭىزگە سالا كەتەيىك، اتالمىش بايقاۋ شارتى بويىنشا كەز كەلگەن ورىنداۋشى كۇي ورىنداۋىن بەينەگە جازىپ الىپ، اتالمىش بەينەنى 2016 -جىلعى 20 - ناۋرىزعا دەيىن nauryz@kaztrk.kz مەكەنجايىنا جولداۋى ءتيىس. كۇيدىڭ ۇزدىك ورىنداۋشىسىن ارنايى ءادىل- قازىلار القاسى انىقتاپ، ونىڭ ەسىمى 21 - ناۋرىز كۇنى بەلگىلى بولادى. جەڭىمپازدار ءتىزىمى بايقاۋدىڭ ارنايى سايتىندا جاريالانادى.
