اۋە شابۋىلىنا قارسى قورعانىس اسكەرلەرى توتەنشە جاعدايلار كەزىندەگى ءىس-قيمىلداردى پىسىقتادى - فوتو
وقۋ-جاتتىعۋعا الماتى گارنيزونى اسكەري بولىمدەرىنىڭ كومانديرلەرى مەن شتاب باستىقتارى، سونداي-اق راديو ەلەكترونيكا جانە بايلانىس اسكەري-ينجەنەرلىك ينستيتۋتىنىڭ كۋرسانتتارى قاتىستى. وتكىزىلگەن ءىس-شارانىڭ ماقساتى جەكە قۇرامنىڭ كۇزەتىلەتىن نىسانداردا قاۋىپ-قاتەر تۋىنداۋىنىڭ الدىن الۋ ماسەلەلەرىندە ءبىرىڭعاي ۇعىنۋ جانە ءىس-قيمىل الگوريتمىن پىسىقتاۋ بولىپ تابىلادى.
«ءبىز توتەنشە جاعدايلار تۋىنداعان كەزدە ارنايى ماقساتتاعى بولىمشەلەرمەن ءوزارا ءىس-ارەكەت ەتەتىن كۇشتەردىڭ ۇيىمداستىرىلۋى مەن ءىس جۇزىندە ورىندالۋىن كورسەتكىمىز كەلدى»، - دەدى 97617 اسكەري ءبولىمى اسكەرلەر قىزمەتى ءبولىمىنىڭ باستىعى پودپولكوۆنيك ۆيكتور سيدورەنكو.
وقۋ-جاتتىعۋدى 97617 اسكەري ءبولىمىنىڭ كومانديرى، پودپولكوۆنيك باقىتجان دۇيسەبەكوۆ پەن وسى ءبولىمنىڭ شتاب باستىعى مايور التىنبەك يساقانوۆ وتكىزدى. وقۋ-جاتتىعۋ كەزىندە كىرەبەرىس جولداردى، اسكەري نىسانداردىڭ ولشەمىن نەمەسە اسكەري ءبولىمدى قارۋلانباعان ادامدارمەن بۇعاتتاۋ كەزىندە اسكەري ءبولىم كومانديرلەرىنىڭ، تاۋلىكتىك ناريادتاعى لاۋازىمدى ادامدار مەن اسكەري ءبولىم جەكە قۇرامىنىڭ پراكتيكالىق ءىس-قيمىلدارىن كورسەتتى. وقۋ-جاتتىعۋعا قىزمەتتىك يتتەرمەن بىرگە كينولوگيالىق قىزمەتتىڭ قىزمەتكەرلەرى جانە جەدەل دەن قويۋ توبى تارتىلدى.
