دزيۋدودان الەم بىرىنشىلىگىنىڭ جۇلدەگەرى قاراقشىلىق جاساپ ۇستالدى

ۇستالعانداردىڭ ءبىرى - حالىقارالىق ساناتتاعى سپورت شەبەرى، دزيۋدودان الەم چەمپيوناتىنىڭ جۇلدەگەرى، دەپ حابارلايدى BNews.kz ءتىلشىسى.

«وتكەن دەمالىستا قاراعاندى وبلىسىنىڭ اۋماعىندا جاسالعان بىرنەشە قاراقشىلىق شابۋىل مەن توناۋعا قاتىسى بار كۇدىكتىلەردى ۇستاۋ وپەراتسياسى ءوتتى. سەزىكتىلەردى قۇرىقتاۋ ءۇشىن وبلىستىق ءى ءى د اۋماقتىق بولىمشەلەرىنىڭ، ۇيىمداسقان قىلمىسپەن كۇرەس جانە كريمينالدى پوليتسيا قىزمەتكەرلەرىنەن قۇرالعان جەدەل تەرگەۋ توبى قۇرىلدى»، - دەپ ءمالىم ەتتى قاراعاندى وبلىسى ءى ءى د باسپا ءسوز قىزمەتىنىڭ جەتەكشىسى باقىتجان قۇدياروۆ.

پوليتسيانىڭ مالىمەتىنشە، كۇدىكتىلەردىڭ ءبىرى، دزيۋدودان الەم چەمپيوناتىنىڭ جۇلدەگەرى - 24 جاستاعى جىگىت استانادا جەدەل ىزدەۋ شارالارىن وتكىزۋ بارىسىندا ۇستالعان. ال ونىڭ 27 جاستاعى سىبايلاسى تەمىرتاۋ قالاسىندا قۇرىقتالدى.

«قولعا تۇسكەن ەكى ازامات تا بەس قاراقشىلىق شابۋىل جاساعانىن مويىندادى، زاتتاي ايعاقتار تاركىلەنۋدە. سەزىكتىلەردىڭ وبلىس اۋماعىندا جاسالعان وزگە دە قىلمىستارعا قاتىسى بار-جوقتىعى تەكسەرىلۋدە»، - دەپ ءمالىم ەتتى پوليتسيادان.

ءى ءى د- دان اتاپ وتكەندەي، قىلمىستىق توپ نەگىزىنەن بۋكمەكەر كەڭسەلەرىن تورۋىلداعان. بەتپەردە كيگەن ولار كەڭسەگە باسا-كوكتەپ كىرىپ، ونداعى قىزمەتكەرلەردى قارۋمەن قورقىتىپ، اقشا العاننان كەيىن، ىزدەرىن جاسىرىپ وتىرعان.

قازىرگى تاڭدا ۇستالعاندار ۋاقىتشا ۇستاۋ اباقتىسىنا قامالدى، سوتقا دەيىنگى تەرگەۋ ءجۇرىپ جاتىر.

bnews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى