قازاقستاندا بەيرەسمي ديلەردەن ساتىپ الىنعان تويوتا مەن لەكسۋس كولىكتەرىنە دە كەپىلدىك بەرىلەتىن بولدى

بۇل تۋرالى بۇگىن الماتى قالاسىندا وتكەن باسپا ءسوز ءماسليحاتى بارىسىندا «تويوتا موتور قازاقستان» كومپانياسى پرەزيدەنتى ەتسۋو حاسينو مالىمدەدى.

«ءبىز كليەنتتەردىڭ سەنىمىن باعالاۋعا مىندەتتىمىز. قازاقستاندا كليەنتتەرىمىز وتە كوپ. سوندىقتان، بۇل شارا سولاردىڭ تالاپ-تىلەگى نەگىزىندە جۇزەگە اسىرىلدى. ءبىزدىڭ ماقساتىمىز - ەڭ ۇزدىك ءونىم مەن ديلەر ىشىندەگى ۇزدىك سەرۆيستى ۇسىنۋ»، - دەدى كومپانيا پرەزيدەنتى.

ءوز كەزەگىندە «تويوتا موتور قازاقستان» كومپانياسىنىڭ ساتۋدان كەيىنگى قىزمەت كورسەتۋ دەپارتامەنتىنىڭ باس مەنەدجەرى ۆيتالي ۆەنچاكوۆ وتكەن جىلى رەسەيلىك رۋبلدىڭ كەنەتتەن قۇنسىزدانۋى قازاقستاننىڭ رەسمي اۆتوكولىك نارىعىنا كەرى اسەرىن تيگىزگەندىگىن اتاپ ءوتتى.

ونىڭ ايتۋىنشا، رەسەيدە اۆتوكولىكتەردىڭ دوللارلىق بالاما باعاسى ءتۇسىپ كەتكەندىكتەن، قازاقستانعا «سۇر يمپورتتار»، ياعني كەدەندىك باعاسى ازايتىلىپ جەتكىزىلەتىن اۆتوكولىكتەر سانى كوبەيگەن.

«وتكەن جىلى تويوتا جانە لەكسۋس اۆتوكولىكتەرىن رەسەيدەن جانە كادىمگى «سۇر» ديلەرلەردەن ساتىپ العان كليەنتتەر بىزدەن رەسمي كەپىلدىك سۇراپ ءجيى كەلدى. ەرەجە بويىنشا كەپىلدىك شارتتارى قازاقستاننىڭ شەكاراسىنان تىس جانە رەسمي ەمەس ديلەردەن ساتىپ الىنعان اۆتوكولىكتەرگە بەرىلمەيتىن. ءبىراق، وندىرۋشىمەن وسىنداي كولىكتەرگە دە دايىنداۋشى - زاۋىتتىڭ كەپىلدىگىن ۇسىنۋ بويىنشا كەلىسۋ قاجەت بولدى. ءبىز سوعان قول جەتكىزدىك»، - دەدى ۆيتالي ميناكوۆ.

ايتا كەتەلىك، كەپىلدىك شارتتارى مەن قايتا تىركەۋگە قاتىستى مالىمەتتەر الداعى ۋاقىتتا www.toyota.kz جانە www.lexus.kz رەسمي سايتتارىندا جاريالاناتىن بولادى.

اۆتور: ايبوتا جاپپاربەرگەن

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى