مۇنداي ىستىقتا شاڭعىمەن تۇعىردان سەكىرۋدەن الەم كۋبوگىن وتكىزگەن ەمەسپىز - ۆ. حوفەر
الماتىدا 2016 - جىلدىڭ 27-28- اقپانى ارالىعىندا شاڭعىمەن تۇعىردان سەكىرۋدەن وتكەن الەم كۋبوگىنىڭ ەكى كۇندىك قىسقى كەزەڭىنىڭ جارىستارى اياقتالعان سوڭ، «قازاقپارات» تىلشىسىنە بەرگەن سۇحباتىندا حالىقارالىق شاڭعى سپورتى فەدەراتسياسىنىڭ (FIS) شاڭعىمەن تۇعىردان سەكىرۋ بويىنشا جارىستارىنىڭ ديرەكتورى ۆالتەر حوفەر وسىلاي دەدى.
«الماتىدا كۇن ىستىق بولدى. مۇنداي جوعارى تەمپەراتۋرادا شاڭعىمەن تۇعىردان سەكىرۋدەن الەم كۋبوگىن وتكىزىپ كورگەن ەمەسپىز. ارينە، سلوۆەنيانىڭ پلانيتسا قالاسىنداعى جارىستار بارىسىندا دا كەيدە كۇن جىلى بولادى. 1995 -جىلعى الەم چەمپيوناتى بارىسىندا دا كۇن جىلى بولعان. ءبىراق، مۇنشالىقتى دەڭگەيدە ەمەس. الماتىداعىداي جاعداي مەنىڭ ەسىمدە جوق. سوعان قاراماستان، جارىس وتە جوعارى دەڭگەيدە وتكىزىلدى. ۇيىمداستىرۋشىلار مەن ەرىكتىلەردىڭ جۇمىسىنا ريزامىن»، - دەدى ۆ. حوفەر.
ول سونىمەن قاتار، قازىر زاماناۋي تەحنولوگيالاردىڭ ارقاسىندا قىسقى كەزەڭدەردى جىلى اۋا- رايىندا دا وتكىزە بەرۋگە بولاتىندىعىن جەتكىزدى.
«ارينە، قازىر جاڭا تەحنولوگيالار شىعىپ جاتىر. سولاردىڭ ارقاسىندا قاردى جاساۋعا دا مۇزداتۋعا بولادى. ءتىپتى سەكىرۋ ەكپىنىن كۇشەيتۋ ءۇشىن پلاستيك تە قولدانىلادى. ءبىراق، ءار نارسەنىڭ شەگى بولادى عوي. الماتىدا اۋا تەمپەراتۋراسى 17 گرادۋستان جوعارى بولدى. بۇل مەن ءۇشىن رەكورد»، - دەپ كۇلدى ۆ. حوفەر.
ايتا كەتەلىك، بيىل بۇكىل ەۋروپا ەلدەرىندە اۋا- رايى ەرەكشە جىلى بولعانى ءمالىم. سوندىقتان، شاڭعىمەن تۇعىردان سەكىرۋ بويىنشا الەم كۋبوگىنىڭ كەزەڭدەرى كۇردەلى جاعدايدا ءوتتى.
ءبىراق، الماتىداعى كۇننىڭ ىستىقتىعى بارلىعىنان اسىپ ءتۇستى.
جارىستىڭ العاشقى كۇنى - 27- اقپاندا قالادا اۋا تەمپەراتۋراسى 20 گرادۋسقا دەيىن جىلىندى.
اۆتور: ايبوتا جاپپاربەرگەن
