اتىراۋلىق اجەلەر تايەكۆوندونى كاسىبي سپورت شەبەرىنەن ۇيرەنۋدە

كارىس ەتنومادەني بىرلەستىگىنىڭ مۇشەلەرى وسىلاي ەرەكشە سپورت كلۋبىن اشىپ، كوپشىلىككە ۇلگى بولۋدا، دەپ جازادى 24.kz. كارىستەردىڭ ۇلتتىق سپورت ءتۇرى - تايەكۆوندونى اجەلەرگە كاسىبي سپورت شەبەرى ۇيرەتەدى.

كلۋب مۇشەلەرىنىڭ ەڭ جاسى الپىستان اسسا، سوڭى - سەكسەندى القىمداعان قاريالار. قازىر سپورتتىق كلۋبتىڭ جيىرماعا جۋىق تۇراقتى مۇشەسى بار. بيىل جاسى سەكسەنگە شىعاتىن ليۋبوۆ حەن وسىندا كەلگەلى قان قىسىمىم قالپىنا كەلىپ، دەنەمنىڭ قۇرىس- تۇرىسى جازىلا باستادى دەيدى.

«ءوزىمدى جاقسى سەزىنەمىن. بۇرىن اياعىم، بەلىم اۋىراتىن وسى جاتتىعۋلاردىڭ ارقاسىندا قازىر ءبىرشاما جاقسى بولىپ كەلە جاتىرمىن. قاتىسامىن دەگەن قاريالاردىڭ بارلىعىن ءوز قاتارىمىزعا شاقىرامىز. ەسىگىمىز ءارقاشان اشىق»، - دەيدى زەينەتكەر ليۋبوۆ حەن.

جاتتىقتىرۋشى تايەكۆوندادان قارا بەلبەۋ يەگەرى، كاسىبي سپورتشى - قابيبەك مۇحيتوۆ قارتتاردىڭ قۇلشىنىسىنا جوعارى باعا بەرىپ وتىر. بولاشاقتا ەرەسەكتەر اراسىندا ۇيىمداستىرىلاتىن جارىستارعا قاتىسۋدا جوسپاردا بار.

«كەلگەن كەزدە بۇل كىسىلەر كىشكەنە دەنە قيمىلدارى اۋىرلاپ، توسىنداۋ كورىنىپ ەدى. قازىر قاراپ وتىرسام، كۇننەن- كۇنگە جاقسارىپ كەلە جاتىر. قاتىسام دەگەن، ۇيرەنەم دەگەن قۇلشىنىستارى وتە جوعارى. قازاقستان بويىنشا وسىنداي ۇلكەن جاستاعى ادامدارعا ارنالعان ۇيىمدار كوبىرەك اشىلسا دەيمىز. ءبىز سوعان ۇلگى بولۋعا دايىنبىز»، - تايەكۆوندودان ق ر ەڭبەك سىڭىرگەن باپكەرى قابيبەك مۇحيتوۆ.

بۇل ۇيىمنىڭ ۇيىتقىسى - «تحونيل» كارىس ەتنومادەني بىرلەستىگى. قارتتار قولى بوس تا سپورتپەن شۇعىلدانادى، ءان سالىپ، بي دە بيلەيدى.

سالاۋاتتى ءومىر سالتىن ۇستانعان قاريالار قاشاندا كوپشىلىككە ۇلگى بولماق. قىستاي سپورت زالىندا شۇعىلدانعان قاريالار كۇن جىلىنا قالا كوشەلەرىنە ۆەلوسيپەدپەن سەرۋەنگە شىعۋدى دا جوسپارلاپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى