الماتىدا ءوتىپ جاتقان الەم كۋبوگىنىڭ كەزەڭدىك جارىستارىن ۇيىمداستىرۋشىلعا ريزامىن - س. تاكاناشي
ەرلەر مەن ايەلدەر اراسىندا ءوتىپ جاتقان سايىستارعا الەمنىڭ 15 ەلىنەن 150-گە تارتا سپورتشىلار قاتىسۋدا.
قازاقستاننىڭ اتىنان بۇگىن اعايىندى مارات جانە راديك جاپپاروۆ، كونستانتين سوكولەنكو جانە سابىرجان مومىنوۆ ونەر كورسەتەدى. ايەلدەر اراسىندا ازىرگە سپورتشىلارىمىز جوق.
كەشە، العاشقى كۇنگى جارىستاردىڭ ناتيجەسى بويىنشا
جاپونيالىق سارا تاكاناشي مەن سلوۆەنيالىق پەتەر پرۆەتس جەڭىسكە جەتكەن بولاتىن. سپورتشىلار ەكى رەتتەن سەكىردى.
سارا تاكاناشي سەكىرۋ قورىتىندىسى بويىنشا 252.6 بالل جيناپ، ايەلدەر اراسىندا جەڭىمپاز اتاندى. ەكىنشى جانە ءۇشىنشى ورىندار اۆستريالىق سپورتشىلار - دانيەل يراشكو- شتولتس (245.3) پەن جاكلين زايفريدسبەرگەرگە (239.2) بۇيىردى.
«مەن بۇعان دەيىن وسى «سۇڭقاردا» تۇعىردان سەكىرۋ بويىنشا الەم كۋبوگىنىڭ جازعى گران- پري جارىستارىنا بىرنەشە رەت قاتىسقان ەدىم. ال قىسقى جارىستارعا ءبىرىنشى رەت قاتىسۋىم. ارينە قوبالجىدىم. ءبىراق، سوعان قاراماستان جاقسى ناتيجە كورسەتە الدىم. ۇيىمداستىرۋشىلار مەن ەرىكتىلەردىڭ جۇمىسىنا ريزامىن. تۇعىردى وتە جاقسى دايىنداعان. ەندى قازاقستانعا تاعى دا كەلەمىن دەگەن ۇمىتتەمىن»، - دەدى جارىس سوڭىندا وتكىزىلگەن بريفينگ بارىسىندا س. تاكاناشي.
ەرلەر اراسىنداعى جارىستا سلوۆەنيالىق سپورتشى پەتەر پرۆەتستىڭ باعى جاندى. ول سەكىرۋ قورىتىندىسى بويىنشا 272.7 بالل جيناپ، جەڭىس تۇعىرىنا كوتەرىلدى. اۆستريالىق سپورتشى ميحاەل حايبёك 254.7 باللمەن ەكىنشى ورىندى يەلەندى. ال ءۇشىنشى ورىن گەرمانيالىق زيەۆەرين فرويندتىڭ (252) ەنشىسىنە ءتيدى.
«مەنىڭ الماتىعا تۇڭعىش رەت كەلۋىم. «سۇڭقار» كەشەنى ماعان وتە ۇنادى. «الەمدەگى ەڭ ۇزدىك كەشەندەردىڭ ءبىرى» دەپ بەكەرگە ايتىلمايدى ەكەن. بۇگىن سوعان كوزىم جەتتى» ، - دەدى ءوز كەزەگىندە پەتەر پرۆەتس.
ايتا كەتەلىك، بۇل جارىستار الداعى 2017 -جىلى الماتىدا وتەتىن قىسقى ۋنيۆەرسيادا قارساڭىنداعى تەستىلىك جارىستار بولىپ تابىلادى. سونداي- اق، جارىس بارىسىندا ۋنيۆەرسيادانى ۇيىمداستىرۋ كوميتەتىنىڭ جۇمىسى مەن حالىقارالىق «سۇڭقار» شاڭعى تۇعىرلارى كەشەنىنىڭ دايىندىعى تەكسەرىلەدى. بۇل جەردە قالالىق ىشكى ىستەر دەپارتامەنتى دە ءوز قىزمەتىن پىسىقتاۋدا. ءال- فارابي داڭعىلىنان «سۇڭقار» كەشەنىنە دەيىنگى ارالىقتاعى بىرنەشە ءجۇز مەترلىك جول بويىنا ءاربىر 20-25 مەتر سايىن ءبىر- ءبىر ءتارتىپ ساقشىسى تۇرعىزىلدى. ولار قوعامدىق ءتارتىپتى ءجىتى باقىلاۋعا الدى.
الەم كۋبوگى حالىقارالىق شاڭعى سپورتى فەدەراتسياسىنىڭ قولداۋىمەن ءوتىپ جاتىر. قىسقى كەزەڭگە 15 ەلدەن 150-گە تارتا سپورتشى قاتىسۋدا. ولار FIS نۇسقاسى بويىنشا الەمدەگى 30 ەڭ ۇزدىك تۇعىردان سەكىرۋشىلەر تىزىمىنە كىرەدى.
جارىستار Eurosport تەلەارناسى ارقىلى تىكەلەي ەفيردە كورسەتىلىپ جاتىر. جارىستاردى تاماشالاۋ تەگىن.
