وتاندىق انشىلەر تويدان تۇسكەن تابىستارىن قايدا جانە قالاي جۇمسايدى؟
شوۋ بيزنەس وكىلدەرى وزدەرىنەن ارتىلعان اقشالارىن قايىرىلىمدىلىققا بەرە مە؟ كۇنى- ءتۇنى ويىنحانادان شىقپايتىن تانىمال انشىلەر كىمدەر؟ بۇل سۇراقتارعا 31- ارنا ءتىلشىسى جاۋاپ ىزدەدى.
گولليۆۋد جۇلدىزدارى تاپقان قارجىلارىن وڭدى-سولدى شاشاتىندىقتارىمەن ءجيى كوزگە تۇسەدى. اتاقتى بوكسشى مايك تايسون 2 ميلليون دوللارعا التىننان قۇيىلعان قاۋىز ساتىپ السا، پوپ-جۇلدىز بەيونسە گاۋحار تاستارمەن كومكەرىلگەن بىزوكشە اياق كيىمىنە 312 مىڭ كوك قاعاز جۇمساعان. ال پەريس حيلتون جاقىندا 17 كىشكەنتاي يتىنە ارناپ 320 مىڭ دوللارلىق ۇيشىك ساتىپ العان بولاتىن. ال ءبىزدىڭ وتاندىق انشىلەر ونەردەن تاپقان قارجىلارىن قايدا جانە قالاي جۇمسايدى؟
كۇنى-ءتۇنى دامىلسىز جۇمىس ىستەيتىن جۇلدىزدارعا اتاقپەن قوسا بايلىق تا وڭايشىلىقپەن كەلمەيتىنى انىق. دەگەنمەن، شوۋ-بيزنەس وكىلدەرى اتاقتى بولعان سايىن ونەردەن تاباتىن تابىستارى دا ەسەلەنە تۇسەتىنى بار.
ماقپال ءجۇنىسوۆا
حالىق ءارتىسى ماقپال ءجۇنىسوۆا ونەردەن تاپقان كىرىسىنىڭ باسىم بولىگىن ساحنالىق كيىم-كەشەككە جۇمسايدى ەكەن. ارتىلسا تۋعان-تۋىستارىنا، ءتىپتى قاجەت بولسا كونسەرتتەن تۇسكەن بار قارجىسىن قايىرىمدىلىققا دا ارناي سالاتىن ادەتى بار. جاقىندا ماقپال 100 مىڭ تەڭگەگە مۇگەدەك بالاعا اربا سىيلادى.
اقىلبەك جەمەنەي
«ءاننىڭ باعىن ءانشى، ال ءانشىنىڭ باعىن ءان اشادى». بۇل ناقىل ءسوز اقىلبەك جەمەنەيگە قاراتا ايتىلسا كەرەك. سەبەبى، تالاي جىلدار بويى «قىزىل ورىك» ءانى تويدىڭ حيتىنا اينالعانى بەلگىلى. وسىنىڭ ارقاسىندا ءانشىنىڭ قالتاسى ءبىراز قالىڭداپتى. بۇگىندە ءانشى بار جيعان اقشاسىنا جەكە سۋتديا اشىپ، كيىم شەبەرحاناسىنىڭ كاسىبىن دوڭگەلەتىپ وتىر. ونىڭ ۇستىنە ءانشى اناۋ - مىناۋ ەمەس، قىمبات كيىمدەر كيەتىن بولعان.
قالتالى ءارى تانىمال بولعان سايىن انشىلەردىڭ اۋەستەنەتىن ادەتتەرى دە وزگەشە بولا تۇسەدى. اقىلبەك ءبىراز جىلدار بويى قۇمار ويىنعا اۋەستەنگەنىن جاسىرمادى. الايدا، ءانشى اقشانى ءوز قالتاسىنان ەمەس، دوستارىنىڭ ەسەبىنەن جۇمساپ وتىرعان.
نۇرلان ءامىر
قۇمار ويىنعا اۋەستەنگەن ونەر ادامدارى جەتەرلىك. دەگەنمەن، ولاردىڭ كوبى جاسىرادى. «نۇرلان مەن مۇرات» توبىنداعى ءانشى نۇرلان ءامىر بۇرىنعى ادەتىن اشىق ايتىپ ءجۇر.
انشىدە وسىدان ون جىل بۇرىن تانىمالدىلىقتان وزگە الماتىنىڭ قاق ورتاسىندا قۇنى 105 مىڭ دوللارلىق ەكى بولمەلى باسپانا مەن 50 مىڭ دوللارلىق قىمبات كولىك بولىپتى. الايدا، ءوزىنىڭ ايتۋىنشا، سول ءبىر ويىنحاناعا دەگەن قۇمارلىق ءانشىنى بارىنەن ايىرعان ەكەن. ءتىپتى، وسىنىڭ كەسىرىنەن اششى سۋعا دا سالىنعان.
ويىنحانا ارقىلى وڭاي تابىس تابامىن دەگەن نۇرلان ونەرگە ون جىلدان كەيىن قايتا ورالدى. جاقىندا نۇرلان مەن مۇرات توبى قايتا بىرىگىپ، كۇزگە تامان شوۋ-كونسەرت بەرمەك.
ەرنار ايدار
جىلىنا ەكى رەت كونسەرت بەرۋدى ادەتكە اينالدىرعان ەرنار ايدار ونەردەن تاپقان تابىسىن ونەرگە جۇمسايدى.
كۇنى-ءتۇنى ءبي ۇيرەنىپ، ۆوكالدان ساباق الىپ جۇرگەن ءانشى ەرنار جاقىندا قىز-كەلىنشەكتەردىڭ مەرەكەسىنە وراي شوۋ-كونسەرت ۇيىمداستىرماق.
