وڭىرلىك حاب جاس عالىمدار اراسىندا مەملەكەتتىك قىزمەت سالاسىنداعى ۇزدىك ستراتەگياعا بايقاۋ جاريالايدى
بۇل تۋرالى بۇگىن «ينتەللەكتۋالدى كوشباسشى: قازاقستان دامۋىنىڭ جاڭا كەزەڭى» اتتى تاقىرىپتا وتكەن حالىقارالىق كونفەرەنسيادا مەملەكەتتىك قىزمەت سالاسىنداعى وڭىرلىك حاب باسقارۋشى كوميتەتىنىڭ ءتوراعاسى ءاليحان بايمەنوۆ ءمالىم ەتتى.
ءسوز اراسىندا ءاليحان بايمەنوۆ ق ر پرەزيدەنتى جانىنداعى مەملەكەتتىك باسقارۋ اكادەمياسىمەن بىرلەسكەن ءىس-قيمىل جوسپارى ازىرلەنىپ جاتقانىن اتاپ ءوتتى.
«وندا تىڭ زەرتتەۋلەرگە قولداۋ ءبىلدىرىپ، ولاردى ىنتالاندىرۋ ماسەلەسى دە قامتىلىپ وتىر. ەڭ باستىسى جاس عالىم-مامانداردى قولداۋعا، ولاردىڭ زەرتتەۋلەرىن ىنتالاندىرۋعا باعىتتالعان ءبىرقاتار شارالاردى جوسپارلايمىز. سونىڭ ىشىندە ءبىز مەملەكەتتىك قىزمەت سالاسىنداعى پروبلەمالارعا ارنالعان ۇزدىك ستراتەگيالارعا بايقاۋ جاريالاعىمىز كەلەدى. سوعان بايلانىستى حالىقارالىق جۋرنالدار تالاپتارىنا سايكەس دەپ تانىلعان ماقالالاردى وڭىرلىك حاب جۋرنالىندا جاريالايتىن بولامىز. ولاردى حابتىڭ جۋرنالىنا عانا ەمەس، حالىقارالىق جۋرنالدارعا دا شىعارۋعا تىرىسامىز. سوندىقتان دا، بارلىقتارىڭىزدى وسىعان بەلسەندى قاتىسۋعا شاقىرامىن»، - دەدى ءا. بايمەنوۆ.
كونفەرەنسيا بارىسىندا اكادەميا دوكتورانتتارى مەملەكەتتىك باسقارۋ سالاسىنداعى عىلىمي زەرتتەۋلەردىڭ زاماناۋي ادىستەرى تۋرالى باياندامالار جاسادى. سونىمەن قاتار، قازاقستاندا اقپاراتتىق قوعام قۇرۋداعى اقپاراتتىق تەحنولوگيالاردىڭ اتقاراتىن ءرولى تۋرالى اڭگىمە قوزعالدى.
اۆتور: قانات مامەتقازى ۇلى
