جاس مەملەكەتتىك قىزمەتكەرلەردى عىلىمي زەرتتەۋلەرگە كەڭىنەن قاتىستىرۋ كەرەك - ب. ءابدىراسىلوۆ

بۇل تۋرالى بۇگىن «ينتەللەكتۋالدى كوشباسشى: قازاقستان دامۋىنىڭ جاڭا كەزەڭى» اتتى تاقىرىپتا وتكەن حالىقارالىق كونفەرەنتسيادا مەملەكەتتىك باسقارۋ اكادەمياسىنىڭ رەكتورى بولاتبەك ءابدىراسىلوۆ ءمالىم ەتتى.

رەكتوردىڭ ايتۋىنشا، اكادەميانىڭ كوپتەگەن ماگيسترانتتارى مەن دوكتورانتتارى وقۋ بارىسىمەن قاتار، ءارتۇرلى جۇمىس توپتارىنا دا بەلسەندى قاتىسىپ، وندا زاڭنامالىق باستامالاردى، نورماتيۆتىك-قۇقىقتىق قۇجاتتاردى تالقىلاۋعا ارالاسادى. «مەنىڭ ويىمشا، بۇل ءبىزدىڭ ماگيسترانتتار مەن دوكتورانتتاردىڭ زور جەتىستىگى. ويتكەنى، عىلىمي-ادىستەمەلىك قامتىمدىلىق بولماي، بەس ينستيتۋتتىق رەفورما مەن «100 ناقتى قادام» ۇلت جوسپارىن ءتيىمدى جۇزەگە اسىرۋ دا مۇمكىن ەمەس. سوندىقتان دا، جاس مەملەكەتتىك قىزمەتكەرلەردى عىلىمي زەرتتەۋلەرگە كەڭىنەن قاتىستىرىپ، ولاردى زەرتتەۋ ىسىنە مەيلىنشە تارتۋ اسا ماڭىزدى»، - دەپ اتاپ ءوتتى ب. ءابدىراسىلوۆ.

جيىن بارىسىندا اكادەميا دوكتورانتتارى مەملەكەتتىك باسقارۋ سالاسىنداعى عىلىمي زەرتتەۋلەردىڭ زاماناۋي ادىستەرى تۋرالى باياندامالار جاسادى. سونىمەن قاتار، قازاقستاندا اقپاراتتىق قوعام قۇرۋداعى اقپاراتتىق تەحنولوگيالاردىڭ اتقاراتىن ءرولى تۋرالى اڭگىمە قوزعالدى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى