ءدارى- دارمەكتەردىڭ ءبىر بولىگى تەك دارىگەردىڭ ۇسىنىسىمەن عانا ساتىلاتىن بولادى
دەپ حابارلايدى اكىمدىكتىڭ رەسمي سايتى.
جوبا اياسىندا ءدارىحانالار دارىگەرلەردىڭ ۇسىنىسى بولماسا، قولدانۋ ۇزاقتىعىن، مولشەرلەۋدى ءبىلۋدى قاجەت ەتەتىن پرەپاراتتاردى ساتپايدى.
«جوبانىڭ ماقساتى - دارىلىك زاتتاردى راتسيونالدى پايدالانۋ. وكىنىشكە وراي، بۇگىندە كوپتەگەن پرەپاراتتار ەركىن تۇردە ساتىلادى، بۇل حالىققا بەلگىلى ءبىر قاۋىپ توندىرەدى. كۇن سايىن الەمدە جۇزدەگەن ءدارى- دارمەك جاسالادى، ولاردى دۇرىس پايدالانعان جاعدايدا، اۋرۋدى جەڭۋگە بولادى، ال كەرىسىنشە جاعدايدا دەنساۋلىققا اۋىر زارداپ كەلتىرەدى»، - دەدى ق ر دەنساۋلىق ساقتاۋ جانە الەۋمەتتىك دامۋ مينيسترلىگى مەديتسينالىق جانە فارماتسيەۆتيكالىق قىزمەتتى باقىلاۋ كوميتەتىنىڭ استانا قالاسى بويىنشا دەپارتامەنتىنىڭ باسشىسى روزا قۋانىشبەكوۆا.
ونىڭ ايتۋىنشا، رەتسەپىسىز ءدارى- دارمەكتەردى ساتىپ الۋ ءۇشىن بۇرىنعىداي دارىگەردىڭ ۇسىنىسى قاجەت بولمايدى. وعان اۋرۋلاردىڭ جەڭىل ءتۇرىن ەمدەۋگە ارنالعان پرەپاراتتار جاتادى. ال مولشەرلەۋ مەن قولدانۋ ۇزاقتىعىن ءبىلۋدى قاجەت ەتەتىن ءدارى- دارمەكتەر استانالىقتارعا دارىگەردىڭ تاعايىنداۋىنسىز ساتىلمايتىن بولادى.
بۇگىنگى تاڭدا حالىقتىڭ باسىم بولىگى دارىلەردى تانىستارىنىڭ، ارىپتەستەرىنىڭ، تۋعان- تۋىستارىنىڭ ۇسىنىسىمەن الادى جانە ساۋالناماعا سايكەس ەلوردا تۇرعىندارىنىڭ % 18-20 عانا دارىگەردىڭ كەڭەسىنە قۇلاق اسادى.
استانا قالاسىنىڭ فارماتسيەۆتيكالىق قاۋىمداستىعىنىڭ پرەزيدەنتى ستەپان بەرەزيننىڭ اتاپ وتۋىنشە، جوبا كەزەڭ- كەزەڭمەن ەنگىزىلەتىن بولادى. ءبىرىنشى قادام جاسالدى - قالانىڭ بارلىق ءدارىحانالارى مەن ەمحانالارىندا ءوز بەتىنشە ەمدەلۋدەن باس تارتۋعا شاقىراتىن ارنايى پلاكاتتار ىلىنەدى. سونىمەن قاتار، مەديتسينا قىزمەتكەرلەرى ءۇشىن سەمينارلار ۇيىمداستىرىلىپ، حالىق اراسىندا كەڭ اۋقىمدى ءتۇسىندىرۋ جۇمىستارى جۇرگىزىلەدى.
ايتا كەتەيىك، اتالعان جۇيە بيىل قىركۇيەك- قازان ايلارىندا تولىعىمەن ىسكە قوسىلادى، ونىڭ ۇستىنە، جوبا تەك ەلوردادا عانا ەمەس، بارشا قازاقستان بويىنشا قولعا الىنباق.
