قازاقستان جانە رەسەي وقۋشىلارى بىرىگىپ «قاراجورعا» بيلەدى
«سالاۋاتتى ومىرگە ۇيرەنۋ» تەلەكوپىرى بارىسىندا قازاقستان مەن رەسەيدىڭ وقۋشىلارىن ءوز بىلىمدەرىن تەكسەرىپ، ءارقايسسى ءوز ەلىنىڭ ءداستۇرى جايلى باياندادى.
سونداي-اق، وقۋشىلار بىرىگىپ «قاراجورعا» بيلەدى. بۇل ۇسىنىستى قازاقستاندىق وقۋشىلار تاستادى. رەسەيلىك وقۋشىلار دارۋمەنگە تولى تاعامدار دايىنداپ، دەنساۋلىق تۋرالى ءان شىرقادى.
اتالعان ءىس-شارا «سالاۋاتتى تاماقتانۋ مەكتەبى» باعدارلاماسىنىڭ اياسىندا جۇزەگە اسىرىلدى. بۇل حالىقارالىق جوباعا الەمنىڭ 7 مىڭنان استام وقۋشىلارى قاتىسىپ جاتىر.
«تەلەكوپىر ءبىزدىڭ وقۋشىلارىمىز بەن قىزمەتكەرلەرىمىزدى زاماناۋي ءومىر دەڭگەيىنە يكەمدەۋگە اسا قولايلى قۇرال. بۇل ءومىردىڭ بۇلجىماس بولىگى بالا كەزدەن-اق كوڭىل ءبولۋدى تالاپ ەتەتىن - دۇرىس تاماقتانۋ ءتارتىبى. وسىنىڭ ارقاسىندا وقۋشىلارىمىز مەكتەپ تابالدىرىعىنان اتتاعاندا دەنساۋلىعى مىقتى، ءبىلىمى جاقسى، اقپاراتتىق تەحنولوگيانى مەڭگەرگەن، كورشى ەلدەردە دوستارى دا بار وزىنە ءوزى سەنىمدى ادام بوپ قالىپتاسادى» - دەيدى الماتى قالاسى ءبىلىم باسقارماسى «قالالىق ادىستەمەلىك كابينەت» عىلىمي-ادىستەمەلىك زەرتحانانىڭ ءبولىم جەتەكشىسى تاتيانا ەجوۆا.
ايتا كەتۋ كەرەك، «سالاۋاتتى تاماقتانۋ مەكتەبى» جوباسى اياسىندا تەاترلاندىرىلعان قويىلىمداردىڭ فەستيۆال-بايقاۋى ءوتتى. وعان الماتى قالاسىنداعى 21 مەكتەپتىڭ وقۋشىلارى قاتىستى.
اۆتور: گۇلميرا عوسمانالي
