ءبىرىنشى كەزەكتە «دەنساۋلىق» باعدارلاماسى باستاپقى مەديتسينالىق- الەۋمەتتىك كومەك كورسەتۋدى جاقسارتۋعا باعىتتالادى - ت. دۇيسەنوۆا

 «ءبىزدىڭ مينيسترلىك ازىرلەگەن بۇل «دەنساۋلىق» باعدارلاماسى ءبىرىنشى كەزەكتە باستاپقى مەديتسينالىق- الەۋمەتتىك كومەك كورسەتۋ جۇمىسىن جاقسارتۋعا باعىتتالادى. سونداي- اق، باعدارلاما اياسىندا اۋرۋلاردىڭ الدىن الۋ جانە ەسكەرتۋ جۇمىستارى جاڭعىرتىلادى. بيىل دەنساۋلىق ساقتاۋ سالاسىنا مەملەكەتتىك بيۋدجەتتەن 800 ميلليارد تەڭگە ءبولىندى. بۇل قارجىنىڭ ەداۋىر بولىگى ترانسپلانتولوگياعا باعىتتالادى. قازىر ەلىمىزدە جۇرەككە اشىق وتا جاساۋعا، باۋىر مەن بۇيرەكتى اۋىستىرۋعا قول جەتكىزىلدى. بولاشاقتا باسقا دا ورگانداردى اۋىستىرىپ سالۋعا كۇش جۇمسالادى»، - دەدى ت. دۇيسەنوۆا.

سونىمەن قاتار، مينيستر ەلىمىزدە جۇمىسسىزدىق ماسەلەسىن شەشۋگە قوماقتى قارجى جۇمسالاتىندىعىن جەتكىزدى.

 «ۇكىمەت «جۇمىسپەن قامتۋ جول كارتاسى» باعدارلاماسىن قابىلدادى. وعان 100 ميلليارد تەڭگە ءبولىندى. بۇل جەردە، اسىرەسە جۇمىسسىز جۇرگەن جاستاردى وقىتۋ جانە جۇمىسپەن قامتۋعا ەرەكشە كوڭىل بولىنەدى. قازىر ەلىمىزدە 2 ميلليون ادام زەينەتاقىمەن قامتاماسىز ەتىلگەن. بۇعان ەل بيۋدجەتىنەن 700 تريلليون تەڭگە بولىنەدى. ودان باسقا، ەلىمىزدە 800 مىڭ مۇگەدەك جان الەۋمەتتىك جاردەماقى الادى. بيىل مۇمكىندىگى شەكتەۋلى جانداردىڭ جاردەماقىسى - 25 پايىزعا، ورتاق زەينەتاقىنىڭ كولەمى - 9 پايىزعا، شاكىرتاقى 25 پايىزعا ارتتى. ال 1 - قاڭتاردان باستاپ، ازاماتتىق قىزمەتتىڭ بارلىق قىزمەتكەرلەرىنە جاڭا ەڭبەكاقى تولەۋ جۇيەسى ەنگىزىلدى. بۇل شارالارعا 2 تريلليون تەڭگەگە قوسىمشا رەتىندە رەسپۋبليكالىق بيۋدجەتتەن تاعى 267 ميلليارد تەڭگە ءبولىندى»، - دەدى ت. دۇيسەنوۆا.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى