مەملەكەتتىك حاتشى دۇنيەءجۇزى قازاقتارى قاۋىمداستىعى ۇجىمىمەن كەزدەستى

وندا الداعى جىلى قۇرىلعانىنا شيرەك عاسىر تولعالى وتىرعان دۇنيەءجۇزى قازاقتارى قاۋىمداستىعىنىڭ وزگە قوعامدىق ۇيىمداردان ماقساتى مەن مىندەتتەرى بولەك ەكەنى ايتىلدى.

الدىمەن دۇنيەءجۇزى قازاقتارى قاۋىمداستىعى عيماراتىن ارالاپ شىققان گ. ناۋشا قىزى قاۋىمداستىق قىزمەتكەرلەرىنىڭ جۇمىس ورنىن كوردى. ودان كەيىن ءماجىلىس زالىندا ۇجىم مۇشەلەرىمەن تانىسىپ، قاۋىمداستىقتىڭ قازىرگى حال-جاعدايىنان حاباردار بولدى. وندا دۇنيەءجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆ قاۋىمداستىقتىڭ جۇمىس جوسپارىن تانىستىرىپ، شەتەلدەگى قازاق دياسپوراسىنىڭ وزەكتى ماسەلەلەرىن بايانداپ بەردى.

ايتىلعان ۇسىنىستار مەن پىكىرلەردى مۇقيات تىڭداپ، جازىپ العان مەملەكەتتىك حاتشى وزىمەن بىرگە ەرتىپ كەلگەن ق ر مادەنيەت جانە سپورت ۆيتسە-ءمينيسترى عالىم احمەدياروۆ پەن ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ەڭبەك، الەۋمەتتىك قورعاۋ جانە كوشى-قون كوميتەتى ءتوراعاسىنىڭ ورىنباسارى اسلان قارجاۋبايەۆقا ناقتى تاپسىرمالار بەردى.

«كەشە ق ر پرەزيدەنتى نۇرسۇلتان نازاربايەۆ جينالىس وتكىزدى. ونداعى تالقىلانعان ماسەلەلەردىڭ ۇلكەن ءبىر ءبولىمى كوشى-قونعا قاتىستى بولدى. سول جەردە ەلباسى «كوشى-قون تۋرالى» زاڭدى ادەيى قابىلدادى. شەتەلدەن كوشىپ كەلەم دەگەن ورالماندارعا مۇمكىنشىلىك جاساۋ كەرەك. اسىرەسە ءبىلىم بار، جۇمىس ىستەيمىن دەگەندەرگە. الەمدىك داعدارىس سالدارىنان ەندى ەلىمىزگە ەۋروپاداعى قازاقتار دا قازاقستانعا كوشىپ كەلە باستاۋى مۇمكىن. فرانسيادا بولعان كەزدەسۋدە ولار وسىنداي ويلارىن ايتتى. ەلباسى جينالىس كەزىندە وتانداستاردى قولداۋدىڭ ۇلگىسى رەتىندە بىرنەشە رەت رەسەيدەن مىسال كەلتىردى»، - دەدى گ. ءابدىقالىقوۆا. سونداي-اق تالعات اسىل ۇلىنىڭ شەتەلدەگى قازاق دياسپوراسىنىڭ ناقتى سانىنا قاتىستى زەرتتەۋ جۇرگىزۋ ماسەلەسىن قاراستىرۋ جانە قازاق دياسپوراسى اراسىندا قازاقستاننىڭ كوشى-قون ساياساتىن ءتۇسىندىرۋ جۇمىستارىن جانداندىرۋ جونىندەگى ۇسىنىستارىنا قولداۋ كورسەتۋگە ۋادە بەردى.

ەرلىك ەرجان ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى