باۋىرجان بايبەك: الەۋمەتتىك جەلى قالالىق ماسەلەلەردى تەز شەشۋدىڭ ەڭ ءتيىمدى الاڭىنا اينالدى

بۇل تۋرالى بۇگىن الماتىدا قالا تۇرعىندارىمەن جىلدىق ەسەپتىك كەزدەسۋىندە قالا اكىمى باۋىرجان بايبەك مالىمدەدى.

«الماتىلىقتارمەن تىكەلەي بايلانىس ورناتۋ ءۇشىن، الماتى اكىمدىگىنىڭ الەۋمەتتىك جەلىلەردە، سولاردىڭ ىشىندە ينستاگرامدا جەكە پاراعى اشىلدى. قازىرگى تاڭدا وعان 56000 ادام جازىلدى. وندا 400 دەن استام ماتەريال جاريالاندى. تۇرعىندار تاراپىنان 9000 ارىز-شاعىم كەلىپ ءتۇستى. ولاردىڭ 80 پايىزى بارى-جوعى ەكى كۇن ىشىندە شەشىلدى. ماسەلەنىڭ شەشىلگەن، شەشىلمەگەنى ينستاگرامدا ايقىن كورىنەدى. ءبىز ناقتى جاۋاپ بەرىپ جاتىرمىز. سوندىقتان، الەۋمەتتىك جەلى بۇگىندە - قالا ماسەلەلەرىن تەز شەشۋدىڭ وتە ءتيىمدى الاڭىنا اينالدى»، - دەدى ب. بايبەك.

سونىمەن قاتار، قالا باسشىسى الماتىدا زاڭسىزدىقتارعا قارسى كەڭ كولەمدە قوعامدىق ايىپتاۋ جۇيەسىن قالىپتاستىرۋ كەرەكتىگىن ايتتى.

«الماتىدا كەڭ كولەمدە قوعامدىق ايىپتاۋ، قوعامدىق «ۇيالتۋ جۇيەسىن» قالىپتاستىرۋىمىز قاجەت. مىسالى، كاسىپكەرلەر «اعاشتاردى كەسىپ تاستاسام، ايىپپۇل تولەيمىن دە قۇتىلامىن»، - دەپ ويلايدى. ال ەگەر ولاردىڭ بۇل ارەكەتى قوعام تاراپىنان قاتال تۇردە اشىق ايىپتالاتىن بولسا، ول كەلەسى جولى زاڭسىز ارەكەت جاساۋعا ۇيالاتىن بولادى»، - دەدى ب. بايبەك.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى