ەلوردا باسشىلىعى ءتۇرلى سالا جۇمىسكەرلەرىنە قىزمەتتىك پاتەرلەر سالىپ بەرمەك

بۇل تۋرالى بۇگىن حالىق الدىندا ەسەپ بەرۋ جيىنىندا استانا قالاسىنىڭ اكىمى ادىلبەك جاقسىبەكوۆ ءمالىم ەتتى.

«ەلورداداعى قۇرىلىس قارقىنى وتە جوعارى. جىل سايىن 1 ميلليون شارشى مەتر تۇرعىن ءۇي پايدالانۋعا بەرىلەدى. بىلتىر رەكوردتىق 1 ميلليون 759 مىڭ شارشى مەتر تۇرعىن ءۇي سالىنعان. استانانىڭ العاشقى جىلدارىندا بىزدە 150 مىڭ شارشى مەتر ءۇي سالىنىپ وتىرسا، 1 ميلليون شارشى مەتر ءۇي سالۋ كورسەتكىشىنە 2003-جىلى قول جەتكىزگەن بولاتىنبىز. قالادا «قولجەتىمدى باسپانا-2020» باعدارلاماسى ءساتتى ىسكە اسىرىلىپ جاتىر. جەڭىلدىكپەن بەرىلەتىن ۇيلەر قازاقستاننىڭ يپوتەكالىق كومپانياسى، «تۇرعىن ءۇي قۇرىلىس جيناق بانكى»، «سامۇرىق-قازىنا» باسپانا قورى، «نۇرلى جول» باعدارلاماسى ارقىلى بەرىلەدى. سونىمەن قاتار، بىزدە ەسكى ۇيلەردى بۇزۋ باعدارلاماسى دا بار. باسپانا قۇرىلىسىنىڭ 2008-2010-جىلدارعا ارنالعان باعدارلاماسىنا كەلەتىن بولساق، بيىل ءبىز قالىپ قويعان ەكى تۇرعىن ءۇيدى پايدالانۋعا بەرەتىن بولامىز»، - دەپ اتاپ ءوتتى ءا. جاقسىبەكوۆ.

دەگەنمەن، ونىڭ ءسوزى بويىنشا، وكىنىشكە وراي، اتالعان باعدارالامالار ازاماتتاردىڭ بارلىق ساناتتارىن قامتي الماي وتىر.

«كوممۋنالدىق كاسىپورىنداردىڭ، كولىك جانە ەنەرگەتيكالىق سالالاردىڭ جۇمىسكەرلەرىنە، قالانىڭ وزگە دە ۇيىمدارىندا ىستەيتىن ازاماتتارعا، ەلەكتريكتەرگە، جۇرگىزۋشىلەرگە، قۇرىلىسشىلارعا، پوليتسەيلەرگە باسپانا الۋ قيىن. سول سەبەپتى ءبىز قالا دەڭگەيىندە جاڭا باعدارلاما جاساپ شىعارامىز. ۇيلەر سالىپ، ول كىسىلەرگە باسپانانى قىزمەتتىك پاتەرلەر رەتىندە بەرەتىن بولامىز»، - دەپ اتاپ ءوتتى اكىم.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى