استانا وزىنە سالىنعان قاراجاتتى اقتاپ، ەل بيۋدجەتىنە پايدا اكەلە باستادى - ءا. جاقسىبەكوۆ

«ەلوردا وسى ۋاقىت ارالىعىندا دوتاتسيالىق قالادان، دونورلىق قالاعا اينالدى. وزىنە سالىنعان قاراجاتتى اقتاپ، ەل بيۋدجەتىنە پايدا اكەلە باستادى. قالامىزدا شاعىن جانە ورتا بيزنەستى دامىتۋعا ارنالعان جۇيەلى جۇمىستار جالعاسۋدا. قازىر استانانى اقىلدى قالالار قاتارىنا قوسۋ ءۇشىن كوپ جۇمىس جاسالۋدا. مۇنىڭ بارلىعى - قالامىزدىڭ بۇگىنى مەن كەلەشەگىنە جاسالعان ينۆەستيتسيا»، - دەپ باستادى بايانداماسىن قالا باسشىسى.

«كەلەر جىلى ەكسپو كورمەسىن وتكىزەمىز. قازىرگى تاڭدا بۇل شارانى جوعارى دەڭگەيدە وتكىزۋ ءۇشىن جان-جاقتى جۇمىس جۇرگىزىلۋدە. ەلوردامىزدا زامانۋي تەحنولوگيالاردىڭ ءبىلىم مەن عىلىم ورتالىعى بوي كوتەرەدى. تۋريزمىمىز وركەندەپ، ەل پايداسىنا ۇلەس قوسادى. بۇگىندە استانادا الەمنىڭ ەكونوميكالىق جانە ساياسي الپاۋىتتارى جينالىپ، ماڭىزدى شەشىمدەردى قابىلداۋدا. وتكەن جىلى دا اتقارىلعان جۇمىستار از ەمەس. ءاربىر جەتىستىك بىزگە جاڭاشا كۇش پەن قوسىمشا جىگەر بەرەدى. الدىمىزدا ەلباسى قويعان بيىك جوسپارلار مەن حالىق ءۇمىت ارتقان ماڭىزدى جوبالار بار. كەلەشەكتە استانانى كوركەيتۋگە ارنالعان جۇمىستاردى ابىرويمەن ورىندايمىز دەپ سەنەمىن»، - دەدى اكىم.

بيىل بارىنشا كوپ حالىقتى قامتۋ ءۇشىن تۇرعىندارمەن ەسەپتىك كەزدەسۋدىڭ فورماتى وزگەرتىلدى. حالىقپەن ەسەپ بەرۋ كەزدەسۋىنىڭ نەگىزگى بولىگىنەن كەيىن استانا اكىمى ادىلبەك جاقسىبەكوۆ ادامداردى جەكە ءوزى قابىلداۋدى باستايدى. ازاماتتار ەلوردا اكىمىنە نەمەسە ونىڭ ورىنباسارلارىنا ءوز سۇراقتارىن كونگرەسس-حولل عيماراتىندا قويا الادى. قابىلداۋ كەزەكپەن جۇرگىزىلەدى. بۇعان قوسا، حوللدا قالا تۇرعىندارى ءوز سۇراقتارىنا قالالىق باسقارمالار مەن جەكەلەگەن دەپارتامەنتتەردىڭ باسشىلارىنان جاۋاپ الا الادى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى