موڭعولياداعى بوكسشى قازاق قىزى

 نۇرجاميلا باتىربەك قىزى موڭعوليا استاناسى ۇلانباتىر قالاسىنداعى ورتا مەكتەپتەردىڭ بىرىندە وقيدى. 2013 -جىلدان بەرى رەسپۋبليكالىق جارىستاردا جۇلدە الا باستاعان قازاق قىزى موڭعوليا جاسوسپىرىمدەرىنىڭ 2016 -جىلعى چەمپيوناتىندا 48 كيلوگرامم سالماق دارەجەسىندە التىن مەدال الدى.

نۇرجاميلا «ازاتتىققا» بەرگەن سۇحباتىندا جۋىقتا وتكەن جارىس جايلى، ءوزىنىڭ بۇل سپورتقا نەلىكتەن قىزىققانى تۋرالى اڭگىمەلەدى.

ازاتتىق: - اڭگىمەمىزدى جۋىقتا جەتكەن جەڭىسىڭنەن باستايىق. جارىس قالاي ءوتتى، باسەكە قيىن بولدى ما؟

نۇرجاميلا باتىربەك قىزى: - اقپاننىڭ 15-20-سى ارالىعىندا وتكەن جارىسقا موڭعوليانىڭ بارلىق ايماعىنان بوكسشىلار كەلىپ قاتىستى. وسى جارىستا مەن ءوز سالماعىمداعى التىن مەدالمەن قاتار «ۇزدىك بوكسشى» دەگەن اتاق الدىم. جالپى، 48 كيلوگرام ەڭ جەڭىل سالماق بولعاندىقتان، مىقتى بوكسشىلار دا وتە كوپ. سوڭعى ءۇش جىلدا وسى سالماقتا مىقتى قىزداردىڭ سانى كوبەيىپ كەلەدى.

- بوكسشى بولۋعا قالاي قۇمارتتىڭ؟ الدە وتباسىڭدا بوكسشىلار بار ما؟

- جوق. وتباسىمداعىلاردىڭ بارلىعى سپورتتان الشاق. اكەم - ءدىن قىزمەتكەرى، موڭعوليا مۇسىلماندار قوعامىنىڭ باس ديرەكتورى، ەل پرەزيدەنتى اكىمشىلىگىنىڭ جانىنان قۇرىلعان ءدىن ىستەرى باسقارماسىندا قىزمەت ەتەدى. تەك مەن سپورتپەن اينالىسقالى بوكستى قىزىقتاپ، تاماشالايتىن بولدى. ۇيدە اعام ءان ايتادى، ال اپكەم مەن ءسىڭىلىم بيگە قاتىسىپ ءجۇر.

سپورتقا كەلۋىمە الىمجەتتىك سەبەپ بولدى. كىشكەنتاي كۇنىمنەن ۇل بالالارمەن ويناۋعا قۇمار بولدىم. سولارمەن كۇرەسىپ، توبەلەسىپ ءوستىم. مىنەزىم دە ۇلداردىكى سەكىلدى قالىپتاستى. سوندىقتان با، الدە باسقا دا سەبەبى بولدى ما - ورتا سىنىپقا كەلگەندە اينالامداعىلار مەنى بولەكتەپ، ىڭعايى كەلسە تيىسە باستادى. سوسىن ءوزىمدى قورعاۋ ءۇشىن بوكس ۇيىرمەسىنە جازىلدىم.

- مەكتەپتەگى ۇيىرمەگە باراسىڭ با، الدە ارناۋى كلۋبتا دايىندالاسىڭ با؟

​ - «ۋلاان- ارسلان» دەيتىن جەرگىلىكتى بوكس كلۋبى بار. بۇل جەردە تەك جاستار عانا ەمەس، ۇلكەندەر دە جاتتىعادى. وسىدان ءتورت جىل بۇرىن سوندا جازىلىپ، نارمانداح ەسىمدى باپكەردىڭ قولاستىنا بارعانمىن. بۇگىنگە دەيىن سوندا جاتتىعامىن. وسى كلۋبتا قازاق ۇلتىنان تەك مەن عانا. تۇسكە دەيىن مەكتەپتەگى ساباعىما بارىپ كەلەمىن. تۇستەن كەيىن ەكى ساعات ۋاقىتىمدى جاتتىعۋعا ارنايمىن.

- ەندىگى ماقساتىڭ قانداي؟

- موڭعوليا قازاقتارى اراسىنان شىققان بوكسشى قىزدار از. سول سەبەپتى موڭعوليا اتىنان وليمپيادالىق جارىستارعا قاتىسسام دەگەن ماقساتىم بار. بۇل - ازىرگە تەك ارمان. ءبىراق ارمانعا جەتۋ ءۇشىن جۇمىس ىستەپ جاتىرمىن.

- سۇحباتىڭا راحمەت.

«ازاتتىق» سايتى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى