وڭتۇستىك حالقى دۇركىرەتىپ ناۋرىز مەرەكەسىن توعىز كۇن تويلامايدى
ءوز سوزىندە ءوڭىردىڭ ەكونوميكاسى بىلتىرعى جىلمەن سالىستىرعاندا ايتارلىقتاي ارتقانىن ايتقان ايماق باسشىسى الداعى جۇمىستارىمەن دە ءبولىستى. سونىڭ ىشىندە اۋىل شارۋاشىلىعى سالاسىن دامىتۋدى بەس باعىتقا قاراستىرعان. جوسپارلارى تۋرالى قىسقاشا بايانداعان اتامقۇلوۆتىڭ سوزىنەن كەيىن بريفينگكە قاتىسۋشى جۋرناليستەر كوكەيلەرىندەگى ساۋالدارىن جولدادى. رەسپۋبليكالىق باسىلىمداردىڭ ءبىرىنىڭ وكىلىن بيىل ۇلىستىڭ ۇلى كۇنى ناۋرىز ايى كيەلى وڭتۇستىكتە نەشە كۇن تويلاناتىنى مازالايدى.
«سىزگە دەيىنگى اكىم اسقار مىرزاحمەتوۆ ناۋرىز مەرەكەسىن توعىز كۇن تويلاپ، كەرەمەت ءۇردىستى قالىپتاستىرىپ كەتتى. ونى ەلدىڭ وزگە دە ايماقتارى قولدانىستارىنا ەنگىزدى. بۇل بيىل دا جالعاسىن تابادى ما؟»، - دەدى جۋرناليست.
بۇل سۇراققا جاۋاپ بەرگەن وبلىس اكىمى ناۋرىز مەيرامى رەسمي تۇردە ءۇش كۇن تويلاناتىنىنا قاراماستان وڭتۇستىك قازاقستاندىق جۇرتشىلىق مەيرامدى تويلاۋدى ءبىر اپتا بۇرىن باستاپ جىبەرەتىنىن جەتكىزدى.
«ناۋرىز - تاريحتان كەلە جاتقان، داۋىردەن كەلە جاتقان ۇلكەن مەيرام دەپ ەسەپتەيمىن. ول تۇركى ەلىنىڭ مەيرامى. ونى تويلاۋدىڭ دا مەرزىمى بار. ءۇش كۇندىك مەرزىم عوي. حالىقتىڭ كوڭىلى توعىز كۇن ەمەس، حالىقتىڭ كوڭىلى ءبىر ايعا سىيمايدى. ءبىزدىڭ وڭتۇستىكتە مەيرامعا دەيىن ءبىر اپتا بۇرىن باستالادى دا ودان ارى ءبىر ايعا سوزىلىپ كەتەتىن مەيرام بۇل»، - دەگەن بەيبىت باكى ۇلى ءوز ءسوزىن بيىلعى ناۋرىز مەرەكەسىنە ارنالعان جوسپارلارىمەن جالعاستىردى.
«بيىل ءبىراز ءىس-شارالار بار جوسپاردا. جاقىندا ەستيتىن شىعارسىز. ءوز كوزىڭىزبەن كورگىڭىز كەلسە، كۇتەمىز. ول كەزدە بىزدە كۇن دە جىليدى. كۇتەمىز، كەلىڭىزدەر، قۇرمەتتى جۋرناليستەر. ءوز كوزدەرىڭىزبەن كورىڭىزدەر»، - دەپ ءسوزىن تۇيىندەدى وڭتۇستىك قازاقستان وبلىسىنىڭ اكىمى.
