استانا ليللەحاممەر وليمپياداسىنىڭ قاتىسۋشىلارىن قارسى الدى - فوتو
ولاردى ق ر مادەنيەت جانە سپورت مينيستىرلىگىنىڭ ۇيىمداستىرۋىمەن جۋرناليستەر جانە سپورتشىلاردىڭ تۋىس- تۋعاندارى بارىپ، ارنايى كۇتىپ الدى.
ەستەرىڭىزگە سالا كەتەيىك، نورۆەگيا ەلىنىڭ ليللەحاممەر قالاسىندا 12-21 - اقپان ارالىعىندا وتكەن II قىسقى جاسوسپىرىمدەر اراسىنداعى وليمپيادا ويىندارىنا 9 سپورت تۇرىنەن، ياعني بياتلون، كونكي مەن جۇگىرۋ، مانەرلەپ سىرعاناۋ، شورت- ترەك، تاۋ شاڭعىسى سپورتى، شاڭعى سپورتى، تۇعىردان شاڭعىمەن سەكىرۋ، فريستايل (سكي- كروسس) جانە شانا سپورتتارىنان 15 پەن 18 جاس ارالىعىنداعى 18 سپورتشىمىز قاتىسىپ قايتتى.
وليمپيادا ويىندارىندا دۇنيە ءجۇزىنىڭ 70 مەملەكەتىنەن كەلگەن 1100 سپورتشى 16 سپورت تۇرىنەن 70 مەدال جينتىعىن ساراپقا سالدى.
قىسقى وليمپيادا ويىندارىنان جەرلەستەرىمىز ءتورت مەدالعا قول جەتكىزدى. بياتلونشى ارينا پانتوۆا مەن مانەرلەپ سىرعاناۋشى ەليزابەت تۇرسىنباۆا قولا، كونكيشى انۆار مۋحاماديەۆ كۇمىس جۇلدەنى، شورت- ترەكتەن ارالاس كوماندالىق جارىس بويىنشا 6 توپتا سىنعا تۇسكەن وتانداسىمىز انيتا ناگاي بولگار قىزى كاترين مانويلوۆا، لاتىش سپورتشىسى كارليس كرۋسبەرگس جانە جاپونيالىق كازۋكي يوشيناگامەن بىرگە ونەر كورسەتىپ، وليمپيادانىڭ قولا جۇلدەسىنە قول جەتكىزدى.
ەسكە الاتىن بولساق، ينسبرۋك قالاسىندا (اۆستريا) 2012 -جىلدا وتكەن I قىسقى جاسوسپىرىمدەر اراسىنداعى وليمپيادا ويىندارىندا ءبىزدىڭ سپورتشىلارىمىز 10 سپورت تۇرىنە قاتىسىپ، ءۇش مەدالعا قول جەتكىزىگەن بولاتىن. وندا شىعىسقازاقستاندىق بياتلونشى قىز گالينا ۆيشنيەۆسكايا كۇمىس پەن قولا مەدالداردى جەڭىپ العان ەدى. سونداي اق، شاڭعىشىمىز سەرگەي مالىشيەۆ قوسىمشا قولا مەدالعا دا يە بولدى.
سپورتشىلارىمىزدى كۇتىپ الۋ سالتاناتىنان كەيىن، جۇلدەگەرلەرىمىزدى سوزگە تارتىپ، از- كەم سۇحباتتاسۋدىڭ ءساتى تۇسكەن ەدى.
ەركەبۇلان شامۋحانوۆ، قازاقستان دەلەگاتسياسىنىڭ وليمپيادانىڭ سالتاناتتى اشىلۋىندا مەملەكەتتىك تۋ كوتەرۋشى، شورت- ترەكشى:
- وليمپيادا ويىندارىنا ءبىرىنشى رەت قاتىسۋىم. ونىڭ ۇستىنە وليمپيادانىڭ سالتاناتتى اشىلۋىندا مەملەكەتتىك تۋ كوتەرىپ شىقتىم. ماعان ارتىلعان ءۇمىت اۋىر بولدى. ءوزىم دە سونداي اۋىر جاۋاپكەرشىلىكتى ارقالاعانىمدى سەزىندىم. الايدا، جەڭىس تۇعىرىنا جەتە المادىم.
- وعان نە سەبەپ بولدى؟
- جارىس بولعان سوڭ نەشە ءتۇرلى بولادى. قانشا دەگەنمەن وليمپيادا عوي. قوبالجۋ بولدى. ەكى رەتكى جارىستا دا جىعىلىپ قالدىم. بۇل مەن ءۇشىن ۇلكەن سىناق، ۇلكەن تاجىريبە بولدى. بولاشاقتا ونداي قاتەلىكتەرگە بوي الدىرمايمىن دەگەن ۇمىتتەمىن.
- وسىعان دەيىن قانداي جەتىستىكتەرگە قول جەتكىزدىڭ؟
- وسىعان دەيىنگى ەڭ ۇلكەن جەتىستىگىم اۆستريا ەلىندە حالىقارالىق كونكيشىلەر وداعى (ISU) ۇيىتقى بولىپ وتكىزگەن جارىسىندا جۇلدەگەرى اتاندىم. ال قازاقستان چەمپيوناتتارىندا بىرنەشە رەت جەڭىمپاز اتاندىم.
انيتا ناگاي، II قىسقى جاسوسپىرىمدەر اراسىنداعى وليمپيادا ويىندارىنىڭ قولا جۇلدەگەرى:
- جەڭىسكە جەتۋ وڭاي بولعان جوق. باپكەرلەرىمىزدىڭ ارقاسىندا، سولاردىڭ نۇسقاۋىمەن قولا مەدالعا قول جەتكىزدىم.
- قارسىلاستارىڭ قانشالىق مىقتى بولدى؟
- قارسىلاستارىمنىڭ وسالى جوق. ءبىراق، مەندە ازداپ تاجىريبە جەتىسپەدى دەپ ويلايمىن.
- بولاشاقتا وزىڭنەن وزىپ كەتكەن سپورتشىلاردى قۋىپ جەتۋگە بولادى عوي.. .
- ارينە، مەن بولگاريالىق كاترين مانويلوۆا، لاتۆيالىق كارليس كرۋسبەرگ، جاپونيالىق كازۋكي يوشيناگامەن «6 كوماندا» ساپىندا 4:17.181 مينۋت ۋاقىت كورسەتىپ، مارەگە ءۇشىنشى كەلدىم. بۇل سىندا التىن مەدالدى «2 كوماندا» نورۆەگيالىق انە باي فارشيادا، وڭتۇستىككورەيالىق دجي يۋ كيم، بەلگيالىق ستەينا دەسمە جانە فرانتسيالىق كۆەنتين فەركوك، 4:14.413 مينۋتپەن جەڭىپ الدى. ال ەكىنشى ورىندى «3 كوماندا» ۆەنگريالىق پەترا يازاپاتي، اۆستراليالىق دجۋليا مۋر، گوللانديالىق تەرك دە بوەر، جاپونيالىق كييچي شيگەيرو، 4:14.495 مينۋتپەن جەڭىپ الدى. بۇل كورسەتكىش ناتيجەلەر ايىرماشىلىعى اسا ۇلكەن كورسەتكىش ەمەس.
- ەندى الداعى جوسپارلارىڭمەن بولىسە كەتسەڭ...
- الدا ءالى تالاي باسەكەلەر كۇتىپ تۇر. ءار جارىستا جوعارى ناتيجە كورسەتىپ، ەلىمىزدىڭ تۋىن بيىكتەن جەلبىرەتكىم كەلەدى. بولاشاقتا ەرەسەكتەر دۋىنا قاتىسىپ، وليمپيادانى باعىندىرۋدى ارماندايمىن.
كۇنسۇلتان وتارباي، سۋرەتتەردى تۇسىرگەن اۆتور.
