ەلوردالىق ستۋدەنتتەر سەۋلدە تەگىن ءبىلىم الادى
2004-جىلدان بەرى باعدارلاما بويىنشا اۆتودانەكەرلەۋشى، جيھاز ديزاينەرى، ۆيزاجيست، اسپاز، ينتەرەر ديزاينى، اۆتوموبيل مەحانيكاسى، كۋليناريا جانە باعدارلامالاۋ بويىنشا جاس ماماندار دايارلاندى.
كەلىسىم جاسالعالى ەلوردالىق 70 تەن استام ستۋدەنت سەۋلدە وقىپ، وقۋدى تابىستى اياقتاعاندارى تۋرالى سەرتيفيكاتتار الدى. ءتورت جىل بويى الەمنىڭ سەگىز ەلىنىڭ ىشىنەن استانالىق ستۋدەنتتەر كومانداسى بىرنەشە رەت سەۋل مەرىنىڭ ەرەكشە ءىلتيپاتىنا يە بولىپ، وقۋداعى ۇزدىك جەتىستىكتەرى ءۇشىن حرۋستال كۋبوكپەن ماراپاتتالدى.
كونكۋرسقا ىرىكتەۋ كەزىندەگى قويىلاتىن باستى تالاپ - اعىلشىن جانە كورەي تىلدەرىن ەركىن مەڭگەرۋ، سونداي-اق، تاڭداعان ماماندىق بويىنشا ودان ءارى جۇمىس ىستەۋگە نيەتى. بيىل ءبىلىم گرانتى پوليتەحنيكالىق كوللەدج ستۋدەنتتەرى داميرا تولەگەنوۆا مەن داۆيد زابيروۆقا «باعدارلامالاۋ» جانە «اۆتوموبيل تەحنيكاسى»، سونىمەن قاتار «باعدارلامالاۋ» ماماندىعى بويىنشا قاز تۇتىنۋ وداعىنىڭ ساۋدا-ەكونوميكالىق كوللەدجىنىڭ ستۋدەنتى ايتۋار ساليحوۆقا بەرىلدى.
