ەندى قازاقستاندىقتار شۆەيتساريالىق بانكتەردەگى اقشاسىن جاسىرا المايدى
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە قارجى مينيسترلىگى مەملەكەتتىك كىرىستەر كوميتەتى تاۋەكەلدەر، تالداۋ جانە ستاتيستيكا باسقارماسىنىڭ باسشىسى ەرلان ساعىنايەۆ ءمالىم ەتتى.
دەپارتامەنت باسشىسىنىڭ ايتۋىنشا، قازاقستان ستراسبۋرگ كونۆەنتسياسىن راتيفيكاتسيالاعان بولاتىن. قازاقستاننان بولەك، اتالعان كونۆەنتسياعا الەمنىڭ 90 مەملەكەتى مەن وففشورلىق ايماقتار قوسىلعان.
«كونۆەنتسياعا قوسىلۋشىلاردىڭ بارلىعى دا ءوز ەلدەرىنىڭ رەزيدەنتتەرى تۋرالى مالىمەتتەرمەن الماسا الادى. سوعان سايكەس، ءبىز دە اۆتوماتتى رەجيمدە قازاقستاندىقتار تۋرالى كەز كەلگەن اقپاراتتى، ءتىپتى ولار وففشورلىق ايماقتاردا بولسا دا الا الامىز»، - دەدى باسقارما باسشىسى.
ونىڭ ايتۋىنا قاراعاندا، وففشورلىق ايماقتاردا قاراجاتتارى بار ازاماتتاردى انىقتاۋ جۇيەسى بۇگىنگى تاڭدا ازىرلەنۋ ۇستىندە. «سوندىقتان دا، ازىرشە باقىلاۋ جۇيەسى ورنىعىپ جاتىر. بيىلعى جىلى ءبارى دايىندالادى، سوسىن 2017-جىلدان باستاپ قانا تولىق كولەمدە جۇمىس ىستەيتىن بولادى»، - دەپ ءتۇسىندىردى ول.
سونىمەن بىرگە، باسقارما باسشىسى 2017-جىلدان باستاپ قازاقستاندا بارلىق ازاماتتار شەت ەلدەردەگى وزدەرىنە تيەسىلى كەز كەلگەن مۇلىكتى، اقشالاي قاراجاتتاردى، باعالى قاعازداردى، زاڭدى تۇلعالارداعى قاتىسۋ ۇلەستەرىن دەكلاراتسيالاۋى كەرەكتىگىن ەسكە سالدى.
ونىڭ ايتۋىنشا، دەكلاراتسيالانباعان مۇلىك بويىنشا اكىمشىلىك جاۋاپكەرشىلىك قاراستىرىلادى. ونداي فاكتىلەر العاش انىقتالعان جاعدايدا ءبىرىنشى جاۋاپكەرشىلىك 250 ايلىق ەسەپتىك كورسەتكىشتى قۇرايدى. ال جىل بارىسىندا وسىنداي فاكتىلەر تاعى قايتالانىپ، انىقتالسا اكىمشىلىك ايىپپۇلىنىڭ كولەمى ەكى ەسەلەنىپ، 500 ا ە ك قۇرايدى.
«ەگەر ازامات ءوز مۇلىكتەرىنىڭ، قاراجاتتارىنىڭ زاڭدىق نەگىزىن ءتۇسىندىرىپ بەرە الاتىن جاعدايدا بولسا، وعان زاڭداستىرۋ اكسياسىنىڭ قاجەتى دە شامالى. بۇل رەتتە جاريا ەتۋ مەن كاپيتالدى زاڭداستىرۋ اكسياسى نەگىزىنەن جاسىرىن ۇستالىپ جۇرگەن، سالىقتان جالتارىلعان مۇلىكتەر مەن قاراجاتتارعا قاتىستى بولىپ تابىلادى»، - دەپ ءتۇسىندىردى ەرلان ساعىنايەۆ.
