شەتەل ساراپشىسى قازاقستاندى دۋبايمەن سالىستىردى
بۇگىن استانادا قازاقستان جوعارعى سوتى جانىنداعى حالىقارالىق كەڭەستىڭ العاشقى وتىرىسى ءوتتى.
حالىقارالىق كەڭەس مۇشەلەرىنىڭ ءبىرى، دۋباي حالىقارالىق ورتالىعىنىڭ سوتتاردى تىركەۋشىسى، حالىقارالىق سوت اكىمشىلىگى اسسوتسياتسياسىنىڭ ۆيتسە-پرەزيدەنتى مارك بير ق ر جوعارعى سوت باسشىسىن ءادىل سوت يندەكسى بويىنشا قازاقستاننىڭ بۇكىل الەمدىك بانك رەيتينگىندە پوزيتسياسىن جاقسارتۋىمەن قۇتتىقتادى.
«سوتتاردىڭ جۇمىسىنىڭ قانشالىقتى ماڭىزدى ەكەنىن تۇسىنەمىن. سىزدەردىڭ كوزدەگەن ناتيجەگە جەتەتىندەرىڭىزگە كۇمانىم جوق. مەن ءۇش نارسەنى اتاپ وتكىم كەلەدى. بىرىنشىدەن، قازاقستان - جاھاندىق ەل. قازىر دۋباي دا استانا سياقتى ۇلكەن قالاعا اينالدى. سوندىقتان دا مۇنداي جەرلەردە قابىلدانعان شەشىم بۇكىل الەمگە اسەر ەتەدى. مەنىڭ ويىمشا، جوعارعى سوت قازاقستاننىڭ الەمدىك ەكونوميكاداعى ءرولىن ايقىنداۋ ماقساتىندا وسىنداي كەڭەس قۇردى»، - دەدى مارك بير.
ول كەز كەلگەن ەلدە ينۆەستيتسيانىڭ جاقسى تارتىلۋى ءادىل سوت جۇيەسىنىڭ دۇرىس قالىپتاسۋىنا تىكەلەي بايلانىستى ەكەنىن مالىمدەدى.
«حالىقارالىق ينۆەستيتسيا قورىندا 17 تريلليون دوللار بوس جاتىر. بۇل قاراجات اقشا قاۋىپسىزدىكتە ساقتالاتىن ەلدىڭ نارىعىنا شىعارىلادى. مۇنى دۋباي تاجىريبەسىنەن بىلەمىن. استانا قارجى ورتالىعىنىڭ دا وسىنداي تاجىريبەگە يە ەكەنىنە كۇمان كەلتىرمەيمىن»، - دەدى مارك بير.
قازاقستان جوعارعى سوتىنىڭ باسشىسى قايرات ءمامي ءوز كەزەگىندە قازاقستاننىڭ سوت جۇيەسىنىڭ الدىندا الەمدىك ستاندارتتارعا نەگىزدەلگەن، سونىڭ ىشىندە ينۆەستيتسيا سالاسىنداعى جاڭا مىندەتتەر تۇرعانىن مالىمدەدى. «ءبىز ءۇشىن ناتيجەلى ءادىل سوت قوعامداعى تۇراقتىلىق پەن ءۇمىتتىڭ كەپىلى»، - دەدى قازاقستان جوعارعى سوتىنىڭ باسشىسى.
