تورەعالي تورەالى «وردا» توبىنىڭ ءىزباسارلارىن «شايتانعا» تەڭەدى
ەڭ الدىمەن داستان ورازبەكوۆتىڭ پىكىرىنە ءانشىنىڭ اكەسى ءارى پروديۋسەرى تورەالى ءاليحان ۇلى جاۋاپ بەردى: «ادام بىرەۋگە ءمىن ايتۋ ءۇشىن الدىمەن وزىنەن ىزدەۋى كەرەك. مەن ونى بالاعاتتاپ، جاماندايىن دەپ جاتقان جوقپىن. حالىق ءوزى باعاسىن بەرەدى. شىعارىپ جاتقان اندەرىمىزدىڭ كوبىن ءوزىمىزدىڭ جىگىتتەر جازادى» - دەدى پروديۋسەر.
بۇدان كەيىن ءسوز كەزەگىن تورەعاليدىڭ ءوزى الدى: «مەنىڭ ءبىر تۇسىنبەيتىنىم، قازاقتىڭ جىگىتتەرى ءبىر-بىرىنە ۆيدەو سالەمدەمە جولداپ وتىراتىنداي ۇساقتالىپ كەتكەنى مە؟» - دەپ قىنجىلدى ءانشى. «سىن ايتاتىن بولسا، نەگە ساحنا سىرتىندا ايتىلمايدى ەكەن؟» - دەي كەلە وزگە ەلدەن العان قانداي اندەرى بار ەكەنىن ايتتى.
ءوز رەپەرتۋارىنداعى «بايقوڭىر» مەن «تورەشىم» اندەرىنىڭ اۋەنى شەتەلدىكى ەكەنىن مويىندادى. «بىرەۋدىڭ سىرتىنان بىردەڭە ايتۋ - ەركەككە سىن. ءبىراق ونىڭ دا ايتىپ جاتقانى دۇرىس، شەتەلدەن ءان الىپ ايتپاي-اق قويايىق دەپ جاتقان شىعار، جانى اشىپ جاتقان شىعار. ءبىراق مۋزىكادا ءتىل جوق. ءبىز قازاقشا ايتىپ، تىڭدارمانداردى تەرىس جولعا باعىتتاپ جاتساق، وندا اڭگىمە باسقا. ءبىر ازامات باس كوتەرىپ اڭگىمە ايتسىن. ال بىرەۋدىڭ ءانىن ۇرلاۋدى قويسىن دەپ ايتاتىندار، ەڭ الدىمەن وسى اڭگىمەلەرىن قويسىن!» - دەپ تورەعالي تورەالى «وردا» توبىنىڭ ءستيلى مەن ەربولات بەدەلحاننىڭ شىعارىپ وتىرعان توبىنا («Ninety One»- اۆت.) سىن ايتتى: «رينات زايىتوۆ تا «وردا» توبى جايلى ءوز ازاماتتىق پىكىرىن ايتىپ كەتتى. رينات اعامنىڭ پىكىرىنە مەن دە قوسىلامىن. ۇرلامايمىز با؟ وندا ستيل ۇرلاۋدى دا قويايىق. وندا تۇبەگەيلى كورەياعا ەلىكتەمەيىك. (...) اشىق اڭگىمە كەرەك بولسا، جەكپە-جەك كەرەك بولاتىن بولسا، باسقاشا بولسىن!»
تورەعالي ءتىپتى «وردانىڭ» ءىزباسارلارىن «شايتانعا» تەڭەدى: «شايتان دەگەندى كىشكەنتاي كەزىمىزدەن ەستىپ كەلەمىز. سولاردىڭ تۇرلەرى سولاردىڭ جاساعان توپتارىنىڭ كەيپىنەن بىلىنەتىن سياقتى. قىزىل، جاسىل، كوك، و زاماندا بۇ زامان، ەركەك ادام سىرعا تاعا ما؟ بۇتىنا تىشىپ قويعان ادام قۇساپ اۋىن سالبىراتىپ كيە مە؟ قازاقتىڭ ونەرىنە قانداي پايدا اكەلىپ جاتىر سولار؟» - دەپ قىنجىلدى ءانشى.
ءبىراق ءسوز سوڭىندا «وردا» توبى ول مەكتەپتە وقىپ جۇرگەن كەزدىڭ وزىندە تانىمال بولعانىن ايتىپ ءوتتى. جانە توپ مۇشەلەرى ونىڭ رەپەرتۋارىنا قىزىعۋشىلىق ءبىلدىرىپ جاتقانىنىڭ ءوزى جەتىستىك دەپ بىلەتىنىن ايتتى.
ەستەرىڭىزگە سالا كەتەيىك، «سىرلاسۋ» باعدارلاماسىنا ءبىر اپتا بۇرىن قوناق بولعان داستان ورازبەكوۆ تورەعالي تورەالى جانە تاعى دا باسقا دا ونەرپازداردىڭ شەتەل اۋەندەرىنە قازاقشا ءسوز جازىپ ورىنداۋلارىن سىنعا العان ەدى.
