ەلوردا جۇرتشىلىعى قابىرعالى قالامگەر نۇرعوجا ورازدى اقتىق ساپارعا شىعارىپ سالدى
«ارداقتى الەۋمەت، قازاق ادەبيەتى مەن مادەنيەتى، قازاقتىڭ ۇلتتىق ونەرى ويدا- جوقتا اۋىر قازاعا كەز بولدى. ومىردەن قازاق ادەبيەتىنە ءوزىنىڭ بويىنا بىتكەن دارىنىن ولشەۋسىز ارناعان، ءسوز دەيتىن ونەردى بۇكىل ونەر اتاۋلىنىڭ ىشىندە ەڭ قاسيەتتىسى ساناعان، كىندىگىن وسى ارقا ءوڭىرى كەسكەن قازاقتىڭ اياۋلى، ارداقتى پەرزەنتتەرىنىڭ ءبىرى نۇرعوجا وراز ومىردەن ءوتىپ وتىر»، - دەدى قوشتاسۋ راسىمىندە قازاقستان جازۋشىلار وداعىنىڭ ءتوراعاسى نۇرلان ورازالين.
نۇرلان ورازالين ءوز سوزىندە، ن. وراز ولەڭ دەيتىن ءورىسى كەڭ بولەك دۇنيەدە، ادەبيەت دەيتىن ىرىسى مول الەمدە ءوزىنىڭ ادام بالاسىندا سيرەك بولاتىن كەڭدىگىمەن، تەرەڭدىگىمەن، العىرلىعىمەن ەل جادىندا قالاتىنىن ايتتى.
«ءبىز اقىندى عانا جوعالتقان جوقپىز. ءبىز شىن ماعىناسىنداعى قازاق دەيتىن حالىقتى جاقسى كورەتىن، سوعان قالتقىسىز قىزمەت ەتكەن ازاماتىمىزدان ايىرىلىپ وتىرمىز. ادەبيەتتىڭ ەڭبەك تورىسىنان ايىرىلىپ وتىرمىز. حالىقتىڭ كوشىن باستاعان جاقسى، بىلگىر، بەلگىلى ازاماتىنان ايىرىلىپ وتىرمىز»، - دەدى ن. ورازالين.
نۇرعوجا نارىمباي ۇلى 1932 - جىلى 20 - قازاندا قوستاناي وبلىسى ۋريتسكي (قازىرگى سارىكول) اۋدانىنداعى ماياك كەڭشارىندا تۋعان. 1947 - جىلى تۋعان اۋىلىنداعى جەتىجىلدىق مەكتەپتى ءبىتىرىپ، گۋريەۆ (اتىراۋ) پەدۋچيليشەسىن 1950 - جىلى ءتامامداعان. مۇنايلى جەتىجىلدىق مەكتەبىندە ءبىر جىل مۇعالىم بولعان. 1951 - جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە تۇسكەن. العاشقى توپتاماسى «جاس جۇرەك» (1956) اتتى جاس اقىندار جيناعىنا ەندى. 1956-1958 ج ج. مەكتەپتە ۇستازدىق ەتكەن. 1958-1963 ج ج. قوستاناي وبلىستىق گازەتىندە، 1963-1965 ج ج. «تىڭ ولكەسى» گازەتىندە قىزمەت ەتتى. 1965 - جىلى سەلينوگراد وبلىس ارالىق بولىمشەسىنە جاۋاپتى حاتشى بولىپ تاعايىندالىپ، كەيىننەن «جاڭا سارى ارقا» جۋرنالىنىڭ اشىلۋىنا مۇرىندىق بولدى، باسىلىمنىڭ باس رەداكتورى بولىپ قىزمەت اتقاردى.
قازاق پوەزياسىندا ءوز ءۇنى مەن ورىنى بار اقىن نۇرعوجا وراز ادەبيەتىمىزدىڭ، جالپى رۋحانياتىمىزدىڭ دا سولتۇستىك وڭىرلەردەگى ىلگەرى- كەيىندى كەزەڭدەردەگى وركەنىنە ەرەكشە ۇلەس قوسىپ كەلە جاتقان قارىمدى قالامگەرلەردىڭ ءبىرى بولاتىن.
اسىرەسە، كەشەگى كەڭەستىك جۇيەدە نۇرعوجا وراز باستاعان ات توبەلىندەي عانا جەرگىلىكتى اقىن، جازۋشىلار بۇل ولكەدەگى قازاق ءدىلى مەن ءتىلىنىڭ سولعىن تارتىپ، تامىرىنان ءۇزىلىپ قالماۋىنا ايتۋداي ەڭبەكتەرىن ءسىڭىردى.
1964 -جىلى جارىق كورگەن «تۇڭعىش كىتابىنان» باستاپ ارقالى شايىر قولىنان قالامىن ءبىر ساتكە دە تاستاماي، وقىرماندارىنا «شۇعىلا»، «كوڭىل كوكتەمى»، «تىڭ تۇلەگى»، «قىراندار ۇياسى»، «جاۋقازىن شاق»، «دالا دەمى» تاعى دا باسقا شىعارمالارىن ۇسىندى.
توپتاما ولەڭدەرى ۋكراين، ورىس، قىرعىز تىلدەرىنە اۋدارىلعان.
«قاراكۇيىك» اتتى كەسەك رومانىندا قۇبىلمالى، تولقىمالى زامان احۋالىن، قازاقتىڭ تاعدىر تالايىن، اقيقات بولمىستى شىعارماشىلىق زەردەلىلىكپەن شىنايى سيپاتتادى.
ۇلى عابيت مۇسىرەپوۆتىڭ، ءابدىلدا تاجىبايەۆتىڭ، عافۋ قايىربەكوۆتىڭ، ساعي جيەنبايەۆتىڭ جاقىن دوستارى ساپىندا بولعان جازۋشىنىڭ ايتارى دا، تولعارى دا ۇشان- تەڭىز بولاتىن.
نۇرعوجا وراز قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى، ق ر جۋرناليستەر وداعىنىڭ م. سەرالين اتىنداعى سىيلىعىنىڭ لاۋرەاتى، «استانا» جانە «تاۋەلسىزدىكتىڭ 10 جىلدىعى» مەدالدارىمەن ماراپاتتالعان. «قازاقستاننىڭ ەڭبەك سىڭىرگەن قايراتكەرى» (2006).
اۆتور: مارلان جيەمباي
