نازاربايەۆ مەكتەبىندە جۇمىس ىستەيتىن امەريكالىق العاشىندا قازاقستانعا كەلۋگە قورىققان
دەپ حابارلايدى NUR. KZ ءتىلشىسى.
«مەن بوستون قالاسىنىڭ كىشكەنتاي اۋىلىندا تۇردىم. ول جاقتا قازىر اتا- انام بار. مەن ولاردىڭ جالعىز بالاسىمىن، جاسىم 39- دا. بوستونعا ءار جاز سايىن بارىپ تۇرامىن. بۇل جاققا كەلەر كەزدە مەندە ۇلكەن قورقىنىش بولدى. قازاقستان تۋرالى عالامتوردا اقپارات از، وتىرىك اقپارات كوپ بولدى. بوس كەڭىستىكتە ميف اڭگىمەلەر تولىپ تۇردى. كەلدىم، كوردىم، ءبىر اپتانىڭ ىشىندە پىكىرىم وزگەردى. التى جىل بۇرىن قازاقستان تۋرالى ءبىر كينو شىقتى، اتىن اتاعىم كەلمەيدى. ول وتىرىك كينو، ونى ءوزىم جەك كورەمىن. Google ارقىلى قازاقستاندى تەرگەندە سول كينو شىعاتىن ەدى. سونىڭ وتىرىك ەكەنىن بىلگەننەن كەيىن ول كينوعا قاتتى اشۋلاندىم»، - دەيدى نەيتان لولەر.
كينودا قازاق ءداستۇرىنىڭ بۇرمالانىپ كورسەتىلۋىنە قاتتى اشۋلانعانىن نەيتان جاسىرعان جوق. ونىڭ قازاقستاندا جۇمىس ىستەگەنىنە بەس جىل بولعان. قازاق تىلىندە ەركىن سويلەيدى.
«مەن قازاقشانى ءوزىم ۇيرەندىم. قازاقستانعا كەلگەندە كىتاپ ساتىپ الدىم. ونى وقىپ، كوشەدە ادامدارمەن سويلەسۋدەن باستادىم. مەنىڭ ويىمشا، تاجىريبەدە كوپ پايدالاناتىن بولسا، جەڭىل ۇيرەنەسىڭ. العاشىندا سويلەگەندە قاتە كوپ بولاتىن. ەكى جىل ىشىندە ەركىن سويلەۋدى ۇيرەندىم»، - دەگەن نەيتان ەكى ەل ازاماتتارىنىڭ ايىرماشىلىعىن ايتىپ بەردى.
«قازاقستاندا ادامدار وتە قوناقجاي، ولاردىڭ اراسىندا كوپ دوسىم بار. ۇيلەرىنە شاقىرىپ، داستارحان جايىپ، سىيلايدى. جاقىن دوسىنداي كورىپ، قاشان دا كومەك بەرۋگە دايىن تۇرادى. ولار ءۇشىن قوناق ەڭ ماڭىزدى، ءارقاشان جوعارى قويادى. ولار قوناقتى كۇتىپ الۋدى جاۋاپكەرشىلىك سانايدى. بىزدە تەك جاي قاراي سالادى. كومەك بەرەمىز. ءبىراق اندا- ساندا تەلەفون المايمىز»، - دەيدى ول كۇلىپ.
«امەريكادا قوناقتى وزىمىزگە جاۋاپكەرشىلىك رەتىندە قابىلدامايمىز. قوناق كەلىپ، كەتەتىنىن ءوزى بىلەدى. ولاردى شاقىرۋ، كۇتىپ الۋ، شىعارىپ سالۋ ءبىز ءۇشىن ۇلكەن پروتسەدۋرا. امەريكادا كەلۋشىلەرگە كوڭىل اسا بولىنبەيدى. ال مۇندا كەرىسىنشە. ماعان قازاقتاردىڭ ەتى قاتتى ۇنايدى. اسىلعان ەت پەن قۋىرداقتى جاقسى كورەمىن»، - دەگەن نەيتان قازاقتاردىڭ ۇناعانى سونداي ولاردىڭ اراسىنان كەتكىسى كەلمەيتىنىن ايتتى.
«مەن بولاشاقتا دا قازاقستاندا تۇرعىم كەلەدى. امەريكاعا قايتىپ بارمايمىن. مەن رەسمي تۇردە يسلامدى قابىلداعان جوقپىن. ءبىراق، يسلامنىڭ قۇندىلىقتارى مەن ىشكى جان دۇنيەمە سايكەس كەلەدى. مەن مۇسىلمان مەرەكەلەرى كەزىندە مەشىتكە بارام. ايت نامازىنا بارىپ، شىن نيەتىممەن ساپقا تۇرامىن. سەبەبى، مەن ەلدىڭ مەرەكەلەرىن سىيلايمىن»، - دەدى ول.
نەيتان قازاق قىزعا ۇيلەنگەن. ونىمەن ا ق ش- تا جۇرگەندە اۋەجايدا تانىسقان.
«قازاقستان تۋرالى سويلەستىك. ول كەزدە قازاقشا بىلمەيمىن. قازاق قىزىمەن اعىلشىن تىلىندە سويلەستىم. ازىرگە بالامىز جوق. ايەلىم تۋرالى كوپ ايتقىم كەلمەيدى. ول قاراپايىم ادام، وتە اقىلدى، ءوزى تۋرالى كوپتىڭ بىلگەنىن قالامايدى. مەن ءوزىم تۋرالى اقپاراتتى اشىپ ايتا بەرەمىن. ال، ايەلىم مەن تۋرالى ەشكىمگە ايتپاشى دەپ جالىنادى»، - دەدى وتباسى تۋرالى ايتۋدى قۇپيا قالدىرعان نەيتان لولەر.
