فرانسيا قازاقستانمەن قۇقىقتىق سالاداعى ىنتىماقتاستىقتى نىعايتۋعا ىنتالى - ەلشى فرانسيس ەتەن
كەزدەسۋ بارىسىندا شارتتىق-قۇقىقتىق بازانى كەڭەيتۋ، ترانس ۇلتتىق ۇيىمداسقان قىلمىستىلىققا، تەرروريزم مەن ەكسترەميزمگە، كيبەرقىلمىستىلىققا، ەسىرتكى ساۋداسىنا، زاڭسىز جولمەن الىنعان اقشانى جىلىستاتۋعا قارسى تۇرۋ ءتارىزدى ەكىجاقتى قۇقىقتىق ىنتىماقتاستىقتىڭ كەڭ اۋقىمدى ماسەلەلەرى تالقىلاندى.
باس پروكۋرور قازاقستاننىڭ پروكۋراتۋرا ورگاندارى قىزمەتىنىڭ نەگىزگى باعىتتارى جونىندە، سونداي-اق، قىلمىستىق سوت ءىسىن جۇرگىزۋ سالاسىنداعى ەۋروپا كەڭەسىنىڭ كونۆەنتسيالارىنا قوسىلۋ بويىنشا اتقارىلىپ وتىرعان جۇمىستار تۋرالى حاباردار ەتتى. سونىمەن قاتار، ول قازاقستاننىڭ باس پروكۋراتۋراسى جانىنداعى قۇقىق قورعاۋ ورگاندارىنىڭ اكادەمياسى تۋرالى ايتىپ، فرانسيا جەتەكشى ءبىلىم بەرۋ جانە عىلىمي مەكەمەلەرىمەن، سونىڭ ىشىندە فرانسيانىڭ ۇلتتىق اكىمشىلىك مەكتەبى، پوليتسيانىڭ جوعارى ۇلتتىق مەكتەبى، ۇلتتىق ماگيستراتۋرا مەكتەبىمەن اكادەميانىڭ بايلانىس ورناتۋىنا مۇددەلىلىك تانىتتى.
ا. داۋىلبايەۆ بىزگە دوس مەملەكەت - فرانسيامەن ىنتىماقتاستى نىعايتۋدىڭ باسىمدىعىنا نازار اۋدارا وتىرىپ، ەلىمىزدىڭ جوعارى قاداعالاۋ ورگانى حالىقارالىق قاتىناستاردىڭ دامۋىنا جانە حالىقارالىق قۇقىقتىق قاۋىمداستىققا ەنۋىنە ۇلكەن كوڭىل بولەتىندىگىن ەرەكشە اتاپ ءوتتى.
فرانسيا ەلشىسى ەلدىڭ حالىقارالىق-قۇقىقتىق ساياساتىن جۇرگىزۋدەگى قازاقستاندىق پروكۋراتۋرانىڭ رولىنە جوعارى باعا بەرىپ، قۇقىقتىق سالاداعى ىنتىماقتاستىقتى نىعايتۋعا ىنتالى ەكەنىن راستادى.
تاراپتار قىلمىستىلىققا قارسى تۇرۋ، زاڭدىلىق پەن قۇقىقتىق ءتارتىپتى قامتاماسىز ەتۋ، ادام قۇقىقتارىن قورعاۋ ماسەلەلەرىندەگى قازاقستان مەن فرانسيا قۇزىرەتتى ورگاندارىنىڭ اراسىندا قالىپتاسقان قارىم-قاتىناستاردىڭ دەڭگەيىن قاناعاتتانۋشىلىقپەن اتاپ ءوتتى، سونداي-اق تۇراقتىلىق پەن حالىقارالىق قاۋىپسىزدىكتى كۇشەيتۋ جولىندا ەكى ەل حالىقتارىنىڭ مۇددەلەرىنە ساي ىنتىماقتاستىقتى جان-جاقتى كەڭەيتۋگە جانە دامىتۋعا دايىن ەكەندىكتەرىن ءبىلدىردى.
