ريودا بوكسشىلارىمىز كەم دەگەندە لوندون وليمپياداسىنداعى ناتيجەنى قايتالاۋى كەرەك - س. قوناقبايەۆ

بۇل تۋرالى بۇگىن الماتى وبلىسىنىڭ تالعار اۋدانىندا ورنالاسقان بۇكىل الەمدىك بوكس اكادەمياسىندا «ارۋانا» كوپاتقارىمدىق ساۋىقتىرۋ ورتالىعىنىڭ اشىلۋ ءراسىمى بارىسىندا حالىقارالىق اۋەسقوي بوكس (ا ي ب ا) قاۋىمداستىعىنىڭ ۆيتسە-پرەزيدەنتى، ازيا بوكس كونفەدەراتسياسىنىڭ پرەزيدەنتى، ا ي ب ا- نىڭ سپورتشىلار جانە جاستار جونىندەگى كوميسسياسىنىڭ ءتوراعاسى سەرىك قوناقبايەۆ ءمالىم ەتتى.

«بۇگىنگى تاڭدا بوكس بۇكىل الەم بويىنشا جاڭا دەڭگەيگە كوتەرىلدى. ءار ەلدەردەن مىقتى بوكسشىلار شىعىپ جاتىر. سول سەبەپتى بوكسشىلار اراسىندا باسەكەلەستىك ارتا ءتۇستى. بۇعان ۇلتتىق قۇراما كوماندامىزدىڭ 2015-جىلى دوحا قالاسىندا وتكەن الەم بىرىنشىلىگىندەگى ءساتسىز ونەرى كۋا. بۇل جاعداي ءبىزدىڭ باپكەرلەردىڭ الدىنا جاڭا تالاپتار قويدى. بوكسشىلاردىڭ فيزيكالىق جانە پسيحولوگيالىق دايارلىقتارىنا وزگەرىستەر ەنگىزىلدى. سوندىقتان، ەندى بيىلعى ريو-2016 جازعى وليمپياداسىنان دا مەدالسىز قايتپايمىز دەگەن ۇمىتتەمىز. بۇل جەردە مەنىڭ جەكە پىكىرىم - كەم دەگەندە 2012-جىلعى لوندون وليمپياداسىنداعى ناتيجەنى قايتالاۋىمىز قاجەت»، - دەدى س. قوناقبايەۆ.

سونىمەن قاتار، ول جازعى وليمپيادا ويىندارىنا كاسىپقوي بوكسشىلاردىڭ قاتىسۋ مۇمكىندىگى تۋرالى دا ءوز ويىن ءبىلدىردى.

«بۇل ماسەلە ازىرگە تولىق شەشىمىن تاپقان جوق. تەك تەوريا جۇزىندە قارالىپ جاتىر. قاشان ىسكە قوسىلاتىنى بەلگىسىز. بۇل جەردە ارينە حالىقارالىق وليمپيادا كوميتەتىنىڭ رەسمي رۇقساتى كەرەك. ونىڭ ۇستىنە بۇل وتە شەتىن ماسەلە. نەگە دەسەڭىز، اۋەسقوي بوكسشىلار مەن كاسىپقوي بوكسشىلاردىڭ جارىستارعا دايىندالۋ جانە قاتىسۋ ۇدەرىسى ءارقالاي. مىسالى، كاسىپقوي بوكسشىلار ءبىر بوكس كەشىندە 12 راۋندتىق سايىسقا قاتىسقان سوڭ، 3-4 اي ءۇزىلىس الادى. ال وليمپيادا كەزىندە كەم دەگەندە بەس سايىس وتكىزۋىڭ قاجەت. سوندىقتان، بۇل ماسەلە بويىنشا دا باپكەرلەر مەن باسقا دا مامانداردىڭ ناقتى پىكىرلەرى وتە قاجەت»، - دەدى س. قوناقبايەۆ.

ايتا كەتەلىك، 2012-جىلعى لوندون وليمپياداسىندا بوكستان قازاقستان ۇلتتىق قۇراما كومانداسى 1 التىن، 1 كۇمىس جانە 2 قولا مەدالگە قول جەتكىزگەن بولاتىن. ونىڭ ۇستىنە لوندون وليمپياداسىنىڭ چەمپيونى سەرىك ساپيەۆ (69 كەلى) تەحنيكالىق شەبەرلىگى وتە جوعارى بوكسشى رەتىندە ۆەل باركەر كۋبوگىنا يە بولعان ەدى.

ايتپاقشى، قازاقستان ۆەل باركەر كۋبوگىنا يەلەنۋ جاعىنان ا ق ش- تان كەيىن ەكىنشى ورىندا كەلەدى. بۇعان دەيىن بۇل كۋبوكتى 1996-جىلعى اتلانتا وليمپياداسىندا 81 كەلى سالماق دارەجەسىندە ونەر كورسەتىپ، چەمپيون اتانعان ۆاسيلي جيروۆ پەن 2004-جىلى افينا وليمپياداسىندا 69 كەلى سالماق دارەجەسىندە ونەر كورسەتىپ، التىننان القا تاققان باقتيار ارتايەۆ يەلەنگەن بولاتىن. ال ا ق ش بوكسشىلارى بۇل كۋبوكتى 5 رەت العان.

ال، 2015-جىلى كاتار ەلىنىڭ استاناسى - دوحا قالاسىندا وتكەن الەم بىرىنشىلىگەندە بوكستان قازاقستان قۇراما كومانداسى بار بولعانى 2 كۇمىس مەدالگە عانا قول جەتكىزگەن بولاتىن.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى