قازاقستان قۇراماسىنىڭ وليمپيادا ويىندارىنا ارنالعان كيىمى جەلىدە كۇلكىگە قالدى - فوتو
ەستەرىڭىزگە سالا كەتسەك، كەشە استانا قالاسىندا قازاقستان قۇراماسىنىڭ برازيليادا وتەتىن وليمپيادا ويىندارىنا ارنالعان كيىمى تانىستىرىلعان بولاتىن. وليمپيادا ويىندارىنا ارناپ تىگىلگەن فورمانى كورگەندەردىڭ ءبىرازى، «قازاقستاندىق ديزاينەردىڭ جۇمىس ەمەس، باراحولكادان ساتىپ العان با؟» دەسە، ەندى ءبىرى «بۇلار ەل نامىسىن قورعايتىن سپورتشىعا ەمەس كۇندەلىكتى كيەتىن نارسە» دەپ سىناپ جاتىر.
ءتىپتى قوعام بەلسەندىسى مۇرات ابەنوۆ ءوزىنىڭ جەكە پاراقشاسىندا: «ارزاننىڭ تۇزى تاتىمايدى. ديزاينەرلەرگە ۇنەمدەۋدى دوعارۋ كەرەك. الەمدە سپورت كيىمدەرى كەرەمەت بيزنەس. بىرنەشە تانىمال كومپانيالاردىڭ اراسىندا بايقاۋدى كوپشىلىك كورەتىندەي اشىق جاريالاپ، ۇزدىگىن تاڭداۋ قاجەت»، - دەپ جازعان.
ال، سۋرەتشى- ديزاينەر داۋرەن ماقسۇت ۇلى: «مىنا فوتودا بيىلعى بايراقتى باسەكە - ريو-دە-جانەيرو وليمپياداسىندا قازاقستان سپورتشىلارى وسى فورمانى كيىپ شىعاتىن بولدى دەيدى. ماعان ەش ۇنامادى. نەگە وسىنداي سۇرەڭسىز؟ قازاقتىڭ مەملەكەتتىك رەسمي تۇستەرى نەگە ەسكەرۋسىز قالدى؟ جاۋاپ بەرەر جان بار ما؟»، - دەپ جازعان.
ساتيرا جانرىنىڭ اكتەرى، بەلگىلى رەجيسسەر نۇرتاس ادامباي بولسا وليمپياداعا ارناپ تىگىلگەن فورماعا قارسىلىعىن بىلاي جەتكىزدى.
«ۋبورشيتسا، ستۋدەنت نەدوروگوگو تايسكوگو كوللەدجا ي ستيۋاردەسسا ماۋ (كوستيۋمنىڭ اتتارى)».
دەگەنمەن دە ديزاينەرلەر فورماعا وزگەرىس ەنگىزەتىن بولدى. قورىتىندى نۇسقا كەلەسى اپتادا قايتا تانىستىرىلادى دەپ جوسپارلانۋدا.
ەستەرىڭىزگە سالا كەتسەك، ريو-دە-جانەيرودا جازعى وليمپيادا ويىندارى 2016-جىلدىڭ 5-21- تامىزى ارالىعىندا وتەدى.
