ەكپەدەن باس تارتۋ ارەكەتتەرى قازاقستانداعى ەپيدەميولوگيالىق جاعدايدى ناشارلاتادى - ت. دۇيسەنوۆا
بۇل تۋرالى بۇگىن استانادا دەنساۋلىق ساقتاۋ جانە الەۋمەتتىك دامۋ مينيسترلىگىنىڭ كەڭەيتىلگەن القا ماجىلىسىندە اتالعان ۆەدومسۆتونىڭ باسشىسى تامارا دۇيسەنوۆا ءمالىم ەتتى.
ينفەكسيالارمەن كۇرەستە ۆاكسينالار ەڭ ءتيىمدى ءارى قولجەتىمدى ەكەنىنە توقتالعان مينيستر، قازاقستاننىڭ پروفيلاكتيكالىق ەكپەلەردىڭ ۇلتتىق كۇنتىزبەسى 21 ينفەكسيالىق اۋرۋعا قارسى الدىن الۋ شاراسىن قاراستىراتىنىن اتاپ ءوتتى. حالىقتى يممۋنداۋ شارالارى اقىسىز جۇرگىزىلەدى جانە جىل سايىن 8 ميلليوننان استام ادامعا ەگىلەدى.
«الايدا سوڭعى جىلدارى ۆاكسينالاردان باس تارتۋدىڭ ارتۋى ءۇردىسى بايقالۋدا. بۇل ءوز كەزەگىندە ەلىمىزدەگى ەپيدەميولوگيالىق جاعدايعا كەرى اسەر ەتۋى مۇمكىن»، - دەدى ت. دۇيسەنوۆا.
وسى ورايدا مينيسترلىك تاراپىنان ءتيىستى جول كارتاسى ازىرلەنىپ، ونى جۇزەگە اسىرۋ بيىل باستالادى. وندا ۆاكسينالاۋ بارىسىندا تۋىندايتىن پروبلەمالاردى انىقتاۋ مەن ولاردى جويۋ قاراستىرىلعان.
اۆتور: رۋسلان عابباسوۆ
