قازاقستان ورتالىق ازياداعى قاۋىپسىزدىكتى قامتۋ ماقساتىندا قىرعىزستانعا وتەۋسىز اسكەري تەحنيكالار جونەلتەدى
وتىرىستا «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى وتەۋسىز اسكەري- تەحنيكالىق كومەك كورسەتۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى تالقىلانعان بولاتىن.
كەلىسىمگە ەكى ەلدىڭ قورعانىس مينيسترلەرى 2015 - جىلدىڭ 24 - ماۋسىمىندا استانادا قول قويعان. قۇجاتقا سايكەس قىرعىز تاراپىنا اتىس قارۋلارىن، پاترونداردى، تۇتىندەتكىش گراناتالار مەن قۇتىلاردى، س -75 زىمىران كەشەنىنە قوسالقى بولشەكتەر مەن جيىنتىقتاۋشى بۇيىمداردى بەرۋ كوزدەلەدى. قارۋ- جاراقتار وتەۋسىز نەگىزدە بەرىلەدى.
«قازىرگى تاڭدا تاياۋ شىعىس پەن اۋعانستان اۋماعىندا ورتالىق ازيا ەلدەرىنىڭ قاۋىپسىزدىگىنە ناقتى قاتەر توندىرەتىن ۇدەرىستەر دامۋ ۇستىندە. وسىعان بايلانىستى قىرعىزستاننىڭ قارۋلى كۇشتەرىنە اسكەري- تەحنيكالىق كومەكتەر كورسەتۋ تۋىنداپ وتىرعان قاۋىپتەردىڭ بەتىن قايتارۋعا مۇمكىندىكتەردى ارتتىرادى. تۇتاستاي العاندا، وسى ارقىلى ورتالىق ازيا ەلدەرىنىڭ قاۋىپسىزدىگىن نىعايتۋعا كومەك بەرەتىن بولامىز»، - دەدى قورعانىس ءمينيسترىنىڭ ورىنباسارى وقاس ساپاروۆ.
زاڭ جوباسى پارلامەنت سەناتىنىڭ الداعى ۋاقىتتا وتەتىن جالپى وتىرىسىنا شىعارىلاتىن بولادى.
اۆتور : قانات مامەتقازى ۇلى
