اتى اڭىزعا اينالعان «جامبىل» اتتى ەپيكالىق داستان «قازاقستان» ارناسىندا - فوتو

فيلم «قازاقستان» ارناسىندا 28- اقپاندا، ياعني اقىننىڭ تۋعان كۇنىندە كورەرمەندەر نازارىنا ۇسىنىلادى، دەپ حابارلادى «قازاقستان» ر ت ر ك» ا ق باسپا ءسوز قىزمەتى.

ۇلى اقىن وزىنەن كەيىن باي مۇرا قالدىرىپ، قازاق ادەبيەتى مەن مادەنيەتىنە ۇلكەن ۇلەسىن قوستى. فيلمدە جامبىل جابايەۆتىڭ شىعارماشىلىعى مەن ومىرلىك جولى تولىقتاي كورسەتىلگەن.

ءفيلمنىڭ شىعارماشىلىق توبى باستى ءرولدى سومداۋعا كوپتەگەن تانىمال اكتەرلەردىڭ ىشىنەن كوپ ۋاقىت بويى جەتە ىرىكتەۋ جۇرگىزدى. ناتيجەسىندە جامبىل ءرولى قازاقستان رەسپۋبليكاسىنىڭ ەڭبەك سىڭىرگەن قايراتكەرى، «دارىن» مەملەكەتتىك جاستار سىيلىعىنىڭ لاۋرەاتى، اكتەر، ءانشى، كومپوزيتور، دراماتۋرگ بايعالي ەسەناليەۆكە بۇيىردى.

بايعالي ەسەناليەۆتىڭ ايتۋىنشا، ۇلى تۇلعانىڭ بەينەسىن ەكراندا سومداۋ وڭاي ەمەس، سەبەبى ءتۇسىرىلىم كەزىندە سالماق باس كەيىپكەرگە تۇسەدى.

«مەنى ۇلى اقىنىڭ ءرولىن سومداۋعا شاقىرعاندا، ءبىر مەزەت ويلانباي كەلىسىمىمدى بەردىم. كاستينگكە كەلسەم، باستى رولگە ۇمىتكەر رەتىندە جامبىلدىڭ وبرازىن جامىلعان كوپتەگەن تانىمال اكتەرلەردىڭ فوتولارى ءىلىنىپ تۇر. ولاردان وزىپ جۇلدە الۋ قايدا!؟ - دەپ ويلانىپ قالدىم. دەسەم دە بارعان سوڭ باعىمدى سىناپ كورۋگە بەل بۋدىم. سول كۇنى ءساتتى كۇن بولعاي، ءوتىپ كەتتىم. رەجيسسەر سىرتقى ۇسقىنىما قاراپ ءبىراز سالماق تاستاۋ كەرەك دەدى» - دەپ ەسكە الادى بايعالي ەسەناليەۆ.

جامبىل جابايەۆ كوپ قىرلى ۇلى تۇلعا. ونىڭ اقىندىعىن بىلاي قويعاندا، جىر الىبى ايرىقشا سۋىرىپ سالما شەشەندىگىمەن تانىمال. جامبىلدىڭ پوەزياسى ءاردايىم قاراپايىم حالىقپەن بايلانىستى بولعان.

تەلەسەريالدىڭ نەگىزگى كورىنىستەرى تابيعاتى اسەم الماتى وبلىسىنىڭ «ءۇشقوڭىر» باۋرايىندا، جامبىل وبلىسى مەن ماسكەۋدە ءتۇسىرىلدى.

ەكراندا تەك قانا تاريحي كەيىپكەردىڭ ءومىربايانى ەمەس، سونىمەن قوسا ⅩⅩعاسىردىڭ ورتاسىنداعى ەلىمىزدىڭ سول داۋىردەگى كورىنىسى كورسەتىلگەن.

سونىمەن قوسا، فيلمدە بۇعان دەيىن كوپ ايتىلا قويماعان ۇلى تۇلعانىڭ ومىرىنەن الىنعان قىزىقتى دەرەكتەر كورسەتىلەتىن بولادى. سونىڭ ءبىرى - جامبىل مەن بۇرىمنىڭ ءبىر بىرىنە دەگەن ماحابباتى جايلى بولماق.

ءتۇسىرىلىم توبى دەكوراتسيالارعا، اكتەرلەردىڭ كوستيۋمى مەن وبرزدارىنا جەتە كوڭىل ءبولىپ، ازىرلەگەن. سول ارقىلى جامبىل ءومىر سۇرگەن ءداۋىردىڭ تولىقتاي كورىنىسىن كورسەتە الدى.

فيلمنىڭ رەجيسسەرى - «لاۆە»، «جەڭىس سەمسەرى»، «قازىنا» جانە تاعى باسقا كينوتۋىندىلارمەن تانىمال ءانۋار رايبايەۆ.

كوركەم تۋىندىنىڭ رەجيسسەرى ءانۋار رايبايەۆ: «ءبىز ءتۇسىرىپ جاتقان «جامبىل» اتتى كوركەم فيلم 4 بولىمنەن تۇرادى. قازاق ءسوز ونەرىنىڭ «يمپروۆيزاتسيا» ءۇردىسىن جاڭا ارناعا بۇرىپ، جاڭاشا مازمۇن دارىتقان جامبىل اتامىز، قاراپايىم قارا ءسوزدىڭ مايىن تامىزىپ، تالاي ايتىستا جەڭىسكە جەتكەن، ەل الدىندا بەدەلدى ەدى. جۇدىرىقتاي جۇرەگىنە جەتىسۋ مەن الاتاۋدى بىلاي قويعاندا، بۇكىل الەمدى سىيدىرا بىلگەن، دانا اقىننىڭ ەلگە قالدىرعان اتالىق، دانالىق سوزدەرىن، ەل بۇگىندە اۋزىنان تاستامايدى. جۇرگەن جەرىندە، «مىڭ ءولىپ-مىڭ تىرىلگەن» بارشا قازاققا باتاسىن بەرە جۇرگەن جامبىلدىڭ سول باتاسى بۇگىنگى كۇنى دە جەردە قالماي، ارمانى مەن وي ءورىسى كوككە ورلەگەنىنە قازىرگى «ۇرپاق» ءبىز كۋا! ءبىزدىڭ ماقسات جامبىل اتامىزدىڭ «ادامي» تۇلعاسى مەن قادىر-قاسيەتىن باسقا قىرىنان كورسەتىپ، ابىرويىن كوككە ورلەتۋ».

كارتينادا سونىمەن قاتار ايگۇل ۇلكەنبايەۆا (دينا نۇرپەيىسوۆا)، ءىلياس تۇرمانوۆ (لاۆرەنتيي بەريا)، ايگەرىم سامەنوۆا (كۇلاش بايسەيىتوۆا)، جولامان ءامىروۆ (جاباي)، ەرگەنباي ابۋيەۆ (ءسۇيىنباي)، نۇربەك مۇقىش (كەنەن ازىربايەۆ)، بورانباي مولداحمەتوۆ (مۇحتار اۋەزوۆ)، قانات ءجۇنىسوۆ (ساكەن سەيفۋلين)، كەنتاي اقۇرپەكوۆ (تەمىربەك جۇرگەنوۆ)، باقىت بەدەلحان (باۋىرجان مومىش ۇلى) جانە تاعى دا باسقا بەلگىلى اكتەرلەر وينايدى.

اتى اڭىزعا اينالعان «جامبىل» اتتى ەپيكالىق داستاندى 28- اقپاندا «قازاقستان» ارناسىندا تاماشالاڭىزدار!

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى