رەسەيدەن كەيكى باتىردىڭ باسىن قايتارۋعا كۇش سالۋ كەرەك - س. اقىلباي
«تاۋەلسىزدىكتىڭ بيىلعى 25 جىلدىعى قازاق حالقىنىڭ ۇلت-ازاتتىق كوتەرىلىسىنىڭ 100 جىلدىعىمەن تۇسپا-تۇس كەلىپ وتىر. پاتشالىق رەسەيدىڭ وتارلاۋ ساياساتىنا قارسى كوتەرىلىس قازاقستاننىڭ بارلىق ايماقتارىن تۇگەلدەي قامتىدى. پاتشا ۇكىمەتى قازاق حالقىنىڭ بۇل كوتەرىلىسىن باسىپ-جانشۋ ءۇشىن بارلىق كۇش-جىگەرىن ايامادى. جەتىسۋ، سىرداريا، سەمەي، باتىس قازاقستان وڭىرلەرىندەگى كوتەرىلىستەر بۇرق ەتكەندە، تورعاي دالاسىندا ءابدىعاپپار جانبوسىن ۇلى، امانگەلدى يمانوۆ، كەيكى باتىر باستاعان كوتەرىلىس تە ەڭ ۇزاققا سوزىلعان ۇلت ازاتتىق قوزعالىسىنىڭ ءبىرى بولدى»، - دەيدى سەناتور.
ونىڭ ايتۋىنشا، تورعاي كوتەرىلىسى قازاق حالقىنىڭ تاريحىندا ەرەكشە ورىن الادى. بۇل رەتتە دەپۋتات ماڭگىلىك ەلدىڭ رۋحى مىقتى، وتان سۇيگىش ۇرپاعىن تاربيەلەۋدە ۇلى دالا باتىرلارىن دارىپتەۋدىڭ ماڭىزى زور ەكەنىن اتاپ ءوتتى.
«الايدا، بۇگىنگى ۇرپاق 1916-جىلى بولعان كوتەرىلىس تۋرالى، ونى ۇيىمداستىرۋشى باتىرلار جايىندا تولىق بىلە بەرمەيدى. كەشەگى كەڭەستىك كەزەڭدە دە بۇل كوتەرىلىس تۋرالى شىندىق تولىق ايتىلعان ەمەس. ەندى وسى ولقىلىقتىڭ ورنىن تولتىراتىن كەز كەلدى. وسى كوتەرىلىستىڭ داڭقتى قولباسشىلارىنىڭ ءبىرى، اتاقتى مەرگەن كەيكى باتىر ءوز ەلى ءۇشىن باسىن بايگەگە تىككەندىگى بەلگىلى. باتىردى قىزىل اسكەر ايۋاندىقپەن ءولتىرىپ، ەكى قولى مەن باسىن كەسىپ العان. باتىر بابامىزدىڭ باسى ءالى كۇنگە سانك-پەتەربوردا ساقتاۋلى تۇر. بۇنى ق ر سىرتقى ىستەر مينيسترلىگىنىڭ سۇراۋىنا وراي 1995-جىلى رەسەي سىرتقى ىستەر مينيسترلىگى دە جاۋاپ حاتىندا راستالعان. جالپى كەيكى باتىردىڭ باس سۇيەگىن تۋعان ەلىنە الدىرۋ ماسەلەسى كوپتەن ايتىلسا دا ناتيجە شىققان ەمەس. دەگەنمەن، ۇلت-ازاتتىق كوتەرىلىستىڭ ءجۇز جىلدىعىنا وراي باتىردىڭ باسىن قايتارىپ، تۋعان جەرىنە جەرلەۋ ماسەلەسىن ۇكىمەت قولعا السا يگى»، - دەدى س. اقىلباي.
اۆتور: قانات مامەتقازى ۇلى
