نازىم قىزايباي: استاناداعى الەمدىك سىندا اتاعىمدى قورعاۋعا كۇش سالامىن

نازىم بولاشاق جوسپارلارى مەن باستى ارمانى تۋرالى جانە جەڭە الماي جۇرگەن باستى قارسىلاسى تۋرالى ايتىپ بەردى، دەپ جازادى «الامان» پورتالى.

بالالىق شاعى تۋرالى

مەن اۋىلدا، قاراپايىم وتباسىندا دۇنيەگە كەلدىم. ءبىز وتباسىندا التى اعايىندىمىز. مەن ءۇيدىڭ ءۇشىنشىسىمىن. مەن ومىرگە كەلگەندە قىزىق وقيعا بولىپتى. اكەم ۇل بالا كۇتكەن ەكەن. ءبىراق مەن دۇنيەگە كەلىپپىن، سوعان اكەم ۇل بولمادى دەپ، ءۇش كۇن بويى ءۇن قاتپاي، رەنجىپ جۇرگەن كورىنەدى. بالكىم، اكەم ۇل بولعانىن قاتتى قالاعاندىقتان با ەكەن، بالا كەزىمنەن ۇلدارمەن الىسىپ وينايتىنمىن.

اپكەلەرىم مەن كىشكەنتاي ىنىمە بىرەۋ تيىسسە سولار ءۇشىن توبەلەسەتىنمىن. كوبىنە ۇلدارمەن توبەلەسۋگە تۋرا كەلەتىن. كەيدە ادام جاراتىلىسىنان ءبىر ىسكە جاقىن بولادى عوي. مەن اتا-انام قالاعانداي ۇل بولماسام دا، سپورتقا جاقىن بولدىم. مەكتەپتە باسكەتبول، فۋتبول وينادىم. مەنىڭ بالا كەزدە سپورتقا جاقىن ەكەنىمدى بايقاپ، اۋىلدا بوكس پەن كۇرەستى قاتار ۇيرەتەتىن جالعىز جاتتىقتىرۋشى سپورتقا شاقىردى. بىرەر اي ول كىسىدەن بوكس الىپپەسىن ۇيرەندىم. كەيىن اعام الماتىدا وسى قازىر ءبىز وتىرعان ينتەرناتتىڭ اشىلعانىن ايتتى. سوسىن سىناق تاپسىرىپ ءتۇستىم.

ينتەرناتتا وقۋ تۋرالى

ينتەرنەتتا بەس اي وقىعان سوڭ، العاشقى جارىسقا قاتىستىم. ول جاسوسپىرىمدەر اراسىنداعى ەل بىرىنشىلىگى بولاتىن. ءبىرىنشى كەزدەسۋىم جەڭىستى بولدى.

ءبىرىنشى جارىسىمدا 44 كەلى سالماقتا توپ جاردىم. ءۇش كەزدەسۋ وتكىزىپ، قارسىلاستارىمنىڭ ءبارىن ايقىن ۇتتىم. سودان كەيىن باپكەرىم جۇمابەك اعاي ەرەسەكتەر جارىسىنا قاتىسامىز دەدى. ءبىراق ول كەزدە جاسىم ون التىعا تولماعان. ءبىراق، ول كەدەرگى بولمادى، جولىم بولىپ قىزىلوردادا وتكەن ايەلدەر اراسىنداعى ەل چەمپيوناتىندا 46 كەلىدە ءبىرىنشى ورىن الدىم.

الەم چەمپيوناتى تۋرالى

مەنىڭ سپورتتىق كارەرامداعى ماڭىزدى كەزدەسۋ ول چەدجۋ قالاسىندا وتكەن الەم چەمپيوناتى. 48 كەلى سالماقتا الاڭعا شىعىپ، بەس كەزدەسۋ وتكىزدىم. اقتىق سىنعا ءۇندى بوكسشىسىمەن شىقتىم. وعان جاسوسپىرىمدەر اراسىنداعى الەم چەمپيوناتىندا ەسە جىبەرگەنمىن. سول جولى قارىمتا قايتارۋ ءۇشىن بارىمدى سالدىم. التىنعا دا قول جەتتى.

شىنى كەرەك، ەلگە ورالعانشا جەڭىستىڭ ءتاتتى ءدامى قانداي بولاتىنىن سەزىنىپ ۇلگەرمەدىم. تەك ءانۇران شىرقالعان ساتتە جۇرەگىم ادەتتەگىدەن جيىرەك سوقتى. جەڭىستىڭ قۋانىشىن تەك الماتىنىڭ اۋەجايىنا قونعان ساتتە جانكۇيەرلەرىمنىڭ «نازىم، نازىم» دەپ ايعايلاعان داۋىسىن ەستىگەندە بارىپ سەزىندىم. ناعىز جەڭىستى ءوز جەرىمە كەلگەندە عانا سەزىنە الدىم. جارىستارمەن كوپ ەلدەردە بولدىم. مىسالى، گەرمانيانىڭ ۇيلەرى ەرتەگىدەگىدەي، وتە ادەمى. ءبىراق قانشا ادەمى بولسا دا، باسقا ەلدە ءومىر سۇرگىم كەلمەيدى. مەن قازاقستاندى، الماتىنى قاتتى جاقسى كورەمىن.

الەم چەمپيوناتىنان كەيىنگى كەزەڭ

الەم چەمپيوناتىنان كەيىن ادامدار تاني باستادى، تەلارناعا، گازەت-جۋرنالدارعا سۇحباتقا، ءتۇرلى سالتاناتتى شارالارعا شاقىرا باستادى. ايتپاقشى، وسى سالتاناتتى شارالارعا شاقىرۋدىڭ ارقاسىندا كيىمدەرىمە ۇزىن كويلەكتەر دە قوسىلدى. بۇرىن كوبىنە سپورتتىق كيىم كيەتىنمىن.

8- ناۋرىز قارساڭىندا پرەزيدەنتتىڭ قابىلداۋىندا بولدىم. سول جولى ءبىرىنشى رەت بىرنەشە ساعات بيىك وكشە كيىپ ءجۇردىم. بارلىق ىسكە جاتتىعۋ كەرەك ەكەن. ءوزىم ءۇشىن اشقان جاڭالىعىم: بىرنەشە ساعات بيىك وكشە كيگەننەن، جارىستا جۇدىرىقتاسۋ وڭاي ەكەن.

رينگتەگى سەزىمى تۋرالى

جالپى قورقىنىش سەزىمىنىڭ بولۋى زاڭدى. ەگەر رينگكە شىققاندا قورىقپاسام، قوبالجي باستايمىن. ال ەگەر كەزدەسۋگە دەيىن قورقىنىش بولاتىن بولسا، رينگتە ءوزىمدى سەنىمدى ۇستايمىن.

ايەلدەر بوكسى تۋرالى

بارىنەن اۋىرى - بۇيرەك تۇسىنان سوققى الۋ. مەنى دە كوبىنسە بۇيرەگىمنەن ۇرۋعا تىرىسادى. ءبىراق اياپ وتىرا المايسىڭ. بۇل - سپورت.

جارىستارعا اكەم-انام، باۋىرلارىم كەلمەيدى. مەن قوبالجىماسىن دەپ ويلايدى. ءارى مەن دە تۋعان-تۋىستارىم جوق كەزدە رينگتە ءوزىمدى ەركىن سەزىنەمىن. جارىستان تىس ۋاقىتتا قولىم قالت ەتسە بىردەن اتا-اناما، باۋىرلارىما تارتامىن.

جاينا شەكەربەكوۆا تۋرالى

رينگتە قارسىلاسپىز. ال نەگىزىنەن بىرگە جاتتىعۋ جاسايمىز. سپورتتا قارسىلاستىق كەرەك. قارسىلاس بولماسا سپورتشىنىڭ ءوسىپ-جەتىلۋى قيىن. بارلىق نارسە ءوز قولىمىزدا. كىم كوپ ەڭبەك كورسەتەدى سونىڭ جولى بولادى. الداعى قازاقستان چەمپيوناتىندا كەزدەسەمىز، سول كەزدە جەڭىسكە جەتەمىن دەپ ويلايمىن.

باستى ماقساتى تۋرالى

ءاربىر سپورتشىنىڭ باستى ارمانى - وليمپيادا شىڭىن باعىندىرۋ. بيىل وتەتىن ءتورتجىلدىقتىڭ باستى باسەكەسىندە بارىمدى سالامىن. ول ءۇشىن الداعى جارىستاردا وليمپيادا ليتسەنزياسىن يەلەنۋىم كەرەك. بيىل استانادا وتەتىن الەم چەمپيوناتىندا اتاعىمدى قورعاۋ دا جوسپارىمدا بار.

سپورتتان تىس

قازىر مەن Kaspi Bank- ءتىڭ «Kaspi قاھارماندارى» اتتى جارنامالىق ناۋقانىنا قاتىسىپ جاتىرمىن. بۇل ناۋقان 2014-جىلدىڭ قىركۇيەك ايىنان باستالىپ ىسكە قوسىلدى. ماقساتى ەڭبەكتىڭ ارقاسىندا جەتىستىكتەرگە جەتكەن قازاقستاندىقتاردى ناسيحاتتاۋ. بۇعان دەيىن 7 رەت رەكوردتار كىتابىنا ەنگەن، ايگىلى مارافونشى مارات جىلانبايەۆ، 350 بالانى اسىراپ العان تۇياق ەسقوجينا، الەمنىڭ ەڭ بيىك 8 شىڭىن باعىندىرعان الپينيست ماقسۇت جۇمايەۆ كەيىپكەر بولعان ەكەن. بيىل مەنى شاقىردى. بۇل دا سپورتتاعى جەتىستىكتىڭ، جەڭىستىڭ ناتيجەسى دەپ ويلايمىن. بارشاڭىزدى الدىعا ماقسات قويىپ، جەڭىسكە جەتۋ ءۇشىن تالماي ەڭبەكتەنۋگە شاقىرامىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى