قانات يسلام: قازاقستاندا كاسىپقوي بوكستان الەمدىك دەڭگەيدە سايىستار وتەتىندىگىنە سەنەمىن
كەشە الماتىدا وتكەن كاسىپقوي بوكس كەشى بارىسىندا بەيجىڭ وليمپياداسىنىڭ قولا جۇلدەگەرى، بۇگىندە كاسىپقوي بوكسشى قانات يسلام وسىلاي دەدى.
ونىڭ ايتۋىنشا، قازاقستاندا وسى سەكىلدى بوكس كەشتەرى ءجيى ۇيىمداستىرىلسا، جاس دارىندى بوكسشىلار كوپتەپ شىعاتىن بولادى.
«بولاشاقتا قازاقستاندا كاسىپقوي بوكستان چەمپيوندىق بەلبەۋ ءۇشىن الەمدىك دەڭگەيدە سايىستار وتەتىندىگىنە سەنەمىن. بۇگىنگى بوكس كەشى سونىڭ باستاماسى دەپ ويلايمىن. ول جوعارى دەڭگەيدە ءوتتى. اللا بۇيىرسا، وسىنداي جارىستار ءجيى ۇيىمداستىرىلىپ تۇراتىن بولسا، قازاقتىڭ كوك تۋىن جەلبىرەتەتىن مىقتى جىگىتتەردىڭ شىعاتىنىنا سەنەمىن. مىسالى، بۇگىن 72 كەلى سالماق دارەجەسىندە شارشى الاڭعا شىققان ايدوس ەربوسىن ۇلىنىڭ ونەرىنە ريزا بولدىم. ول ارتىمىزدان كەلە جاتقان ءىنىمىز. كەزىندە تالاي بىرگە جاتتىققانبىز. ول بولاشاقتا وسى سالماق دارەجەسىندە الەمنىڭ ەڭ مىقتى بوكسشىسى بولادى دەپ ويلايمىن جانە سولاي بولسىن دەپ تىلەيمىن. تەك جاراقات الىپ قالماي، ءوزىن لايىقتى دايىنداسا دەيمىن. قازاقتىڭ كوك تۋىن كوتەرەتىن جىگىتتىڭ ءبىرى سول دەپ ويلايمىن»، - دەدى ق. يسلام.
سونىمەن قاتار، ول بيىل ءوزى بەس كەزدەسۋدى وتكىزۋدى جوسپارلاپ وتىرعانىن مالىمدەدى.
«مەندە نەگىزى چەمپيوندىق اتاققا تالاسۋ سايىسى قالدى. دەگەنمەن، بيىل بەس كەزدەسۋ وتكىزۋدى جوسپارلاپ وتىرمىز. سولاردىڭ ءبىرىن استانا قالاسىندا وتكىزسەك دەگەن نيەتىمىز بار. ءقازىر وسى جونىندە كەلىسىم- شارت جاساۋ بويىنشا كەلىسسوزدەر ءجۇرىپ جاتىر. ال دايىندىعىما كەلەر بولسام، بارلىعى جاقسى. باسقا جۇمىس ىستەۋگە ۋاقىت تا، مۇرشا دا جوق. ال، بۇگىنگى بوكس كەشىنە قاتىسقانىما وتە قۋانىشتىمىن»، - دەدى ق. يسلام.
ايتا كەتەلىك، قانات يسلام بۇگىندە ءبىرىنشى جارتىلاي سالماقتا WBA Fedecaribe بەلبەۋىنىڭ يەگەرى.
اۆتور: جاپپاربەرگەن ايبوتا
