الماتى وبلىسىنداعى تىكۇشاق اپاتىنا قاتىستى جاڭا دەرەكتەر پايدا بولدى
بۇل تۋرالى «حابار» تەلەارناسىنا ىشكى ىستەر ءمينيسترىنىڭ ورىنباسارى ۆلاديمير بوجكو حابارلادى.
«اپاتقا سەبەپ بولعان فاكتوردىڭ ءبىرى - قولايسىز اۋا رايى. اينالا تۇمان، ەشتەڭە كورىنبەگەن. سودان تىكۇشاق بارىپ اعاشقا سوعىلىپ، وقىس جاعدايعا ۇشىراعان. بۇلاي دەپ ناقتى ايتۋدىڭ ءوزى ازىرگە ءبىرجاقتى بولىپ ەسەپتەلەدى. بارلىق جاعدايدى كوميسسيا انىقتايدى. جەدەل تەرگەۋ توبى ءالى جۇمىس ىستەپ جاتىر. ءبىز بۇگىن ول جاققا 50 ادام جىبەردىك. ولار ەگجەي-تەكجەيلى تەكسەرىپ بارىپ، ناقتى قورىتىندى جاسايدى»، - دەدى بوجكو تالدىقورعاندا وتكەن جيىننان كەيىن.
شەنەۋنىكتىڭ ايتۋىنشا، اپات سەبەپتەرىن انىقتاۋ ماقساتىندا ەكى كوميسسيا قۇرىلدى. ءبىرىنشىسى وقىس وقيعانىڭ سەبەپ-سالدارىن انىقتاۋمەن، ەكىنشى كوميسسيا قايتىس بولعان ادامداردىڭ وتباسىنا وتەماقى تولەۋ ماسەلەسىمەن اينالىسىپ جاتىر.
ەسكە سالايىق، 27- قاڭتاردا تالدىقورعان ماڭىندا ىشىندە بەس ادام بولعان تىكۇشاق اپاتقا ۇشىرادى. ىشىندە بولعانداردىڭ بارلىعى قازا تاپتى. «اسپان» كومپانياسىنا تيەسىلى UP- MD 600-N تىكۇشاعى ءۇشارالدان وبلىستىق اۋرۋحاناعا ەكى ايلىق نارەستەنى جەتكىزبەكشى بولعان. قايتار جولدا تىكۇشاق جوعالىپ كەتتى.
اۋە اپاتىنان 45 جاستاعى پيلوت ۆيتالي كوندراتيۋك، 52 جاستاعى دارىگەر-گەماتولوگ باقىتگۇل قايسانوۆا، 23 جاستاعى فەلدشەر گۇلنۇر حاميتوۆا، اناسى مەن قىزى - ك. ءابىلقاسىم (1989-جىلعى) جانە ب. ءابىلقاسىم (2015-جىلعى) قازا تاپتى.
ۆيتاليي كوندراتيۋك تاجىريبەلى پيلوت بولعان.
ونىڭ ارتىندا قارت اناسى، ايەلى مەن ەكى بالاسى قالدى.
باقىتگۇل قايسانوۆا ايماقتاعى جالعىز دارىگەر-گەماتولوگ بولعان.
23 جاستاعى فەلدشەر گۇلنۇر حاميتوۆا تۇرمىسقا شىققالى ءجۇر ەكەن.
قىركۇيەك ايىندا ول مەديتسينالىق جوعارى وقۋ ورنىنا ءتۇسۋدى جوسپارلاپتى.
ك ت ك تەلەارناسىنىڭ مالىمەتىنشە، باقىتگۇل قايسانوۆا ايماقتاعى جالعىز دارىگەر- گەماتولوگ بولىپتى. وسى سالادا 13 جىل قىزمەت ەتكەن ول قىزعا كومەكتەسۋ ءۇشىن ءۇشارالعا ءوزى بارۋدى ءجون كورگەن.
ال گۇلنۇر حاميتوۆا فەلدشەرلىك قىزمەتكە ءبىر جارىم جىل بۇرىن قابىلدانعان. قىركۇيەكتە ول مەديتسينالىق ۋنيۆەرسيتەتكە ءتۇسۋدى جوسپارلاپتى. ءتىپتى تۇرمىسقا شىعۋدى ارمانداپ، بارلىعىن تويىنا شاقىرتىپ تا قويعان. جۇمىسىنىڭ اۋىر بولعانىنا قاراماستان ول ۇنەمى كۇلىپ جۇرەدى ەكەن.
پيلوت ۆيتالي كوندراتيۋكتىڭ ارتىندا قارت اناسى، ايەلى مەن ەكى ۇلى قالدى. جۇما كۇنى ونىڭ دەنەسى تۋعان جەرى - جامبىل وبلىسىنا جەتكىزىلدى. ول بۇگىن، سەنبىدە جەرلەنەدى.
